IJK-ano forpelita post seksa agreso

Programero pri "genra perforto" dum la IJK iĝis neatendite konkreta, kiam lernanto de Esperanto anoncis pri seksa perforto okazinta en ŝia propra ĉambro la antaŭan nokton.

Dum la merkredo de la Internacia Junulara Kongreso en Badajoz, Hispanio, okazis programero anoncita kiel "genra perforto".

La sesio tamen iris en tute alia direkto ol supozite, kiam sur la scenejo aperis novulino, kiu en la antaŭa nokto mem spertis perfortan situacion en sia propra ĉambro.

En sia denaska lingvo, kun interpretado ambaŭdirekta, ŝi rakontis, ke samĉambrano tenis kaj tuŝis ŝin malgraŭ ŝiaj insistaj protestoj, kaj ne permesis al ŝi formoviĝi. Nur post kvin minutoj li lasis ŝin eliri kaj poste ekkuŝis en sia lito, kvazaŭ nenio estus okazinta.

Ne helpis al la situacio, ke ili malhavis fortan komunan lingvon.

La sekvan matenon ŝi rakontis al sia grupgvidanto, kiu informis la organizan teamon. La IJK-organizantoj tuj aŭskultis ŝin kaj trovis helpon de spertuloj en la kongresejo por plej bone trakti la situacion.

Ŝi poste akceptis proponon paroli pri la okazaĵo antaŭ granda grupo, por averti aliajn partoprenantojn kaj peti konsilojn.

La ĉeestanta publiko donis konsilojn kaj laŭdojn pro la kuraĝo, sed venis ankaŭ diversaj emociantaj rakontoj de virinoj, kiuj travivis similajn spertojn en kaj ekster Esperanto-renkontiĝoj.

Sekvis diskuto pri la demandoj ĉu iri al polico aŭ ne, ĉu tuj publikigi la nomon de la perfortinto aŭ ne, kaj kion fari por malebligi perfortaĵojn estontece. Unu persono atentigis, ke la viktimoj estas plej ofte komencantinoj, kiuj pro tiu sperto poste restas for de la movado.

Pli malfrue la viktimo havis senrezultan parolon kun la agresinto mem:

– Tio, kion li diris al mi, sonis kiel mensogoj, ŝi diras.

Ŝi decidis ne iri al polico, pro manko de pruviloj kaj la antaŭvidita malfacileco de tio. La agresinto estis forsendita el la kongresejo por la resto de la IJK post interkonsento inter TEJO kaj la viktimo.

Tiu ĉi forta ago kontraŭ seksa miskonduto estas parto de pli granda movado en kaj ekster TEJO kontraŭ seksismo kaj por genra egaleco. Esperinde pliaj asocioj kaj organizantoj de renkontiĝoj same esprimos maltoleron al miskonduto kaj malrespekto, kaj tiel kreos pli sekuran medion por ĉiuj esperantistoj.

La TEJO-estraro volis eviti publikigon de tiu ĉi artikolo, por eviti eblajn konsekvencojn por la agresinto pro publika atakado kaj serĉado de identecoj.

Aliflanke la estraro ĵaŭde vespere faris anoncon al la tuta kongreso por klarigi, ke TEJO ne toleras seksan miskonduton en ajna formo. Faris ĝin antaŭ la vespera koncerto Mark Konijnenberg, estrarano de TEJO, kiu diris jenon:

Mi bedaŭras anonci, ke estis partoprenanto, kiu seksĝenis alian partoprenanton. Sed la LKK kaj la TEJO-estraro forbaris la seksĝeninton de la kongresejo laŭ komuna decido de la LKK kaj de la viktimo. Se vi mem spertis aŭ spertos ion ĝenan, vi povas kontakti la organizantojn, kaj bonvolu fari tion.

Se vi dubas pri via propra konduto, pensu, ke la aŭskulta servo estas tie ankaŭ por vi. Se vi volas paroli pri io ajn, ne hezitu kontakti la aŭskultan servon, Severin, Juandi, Katarina kaj Klára.

La LKK kaj la TEJO-estraro volas, ke estu klare, ke ni absolute ne toleras ajnan seksĝenon [aplaŭdo] kaj estu klare, ke tiu persono riskus tujan forbaron de la IJK. La diskuto pri la konsekvencoj, kiujn povas havi tiaj perfortaj agoj, estos ankoraŭ priparolata de TEJO. Dankon.

Rogier Huurman

38
Lasi respondon

avatar
2000
11 Komento-fadenoj
27 Respondoj al fadeno
0 Sekvantoj
 
Komento kun plej multaj respondoj
Plej furora koment-fadeno
23 Aŭtoroj de komentoj
Marc BavantSennomuloNekatolikoTjeriDubema Lastatempaj aŭtoroj de komentoj

Tiu ĉi retejo uzas Akismet por malpliigi trudaĵojn. Ekscii kiel viaj komentaj datumoj estas traktataj.

  Aboni  
plej nova plej malnova plej populara
Avizi pri
IJK-partoprenanto
IJK-partoprenanto

Mi volas komenti oftan demandon "Kial la organizantoj metis du peronojn de mala sekso en la saman ĉambron". Unue, ĉar ĉiu dum sia aliĝo povis indiki, kun kiu sekso li aŭ ŝi volas kunloĝi, ĉu ina, malina aŭ ne gravas. Tiujn opciojn oni deziras havi kiel partoprenanto. Due, la viktimo mem konsentis esti en gea ĉambro. Por tiuj, kiuj klasikmaniere volas kulpigi la viktimon, mi volas diri, ke kvankam ŝi mem konsentis esti en la gea ĉambro, tio ne signifas ke ŝi konsentis esti seksĝenita. Trie, la problemo de seksĝenado ekzistas minimume ekde kiam la junularaj aranĝoj ekzistas kun partoprenantoj… Legi pli »

Katoliko
Katoliko

En via mesaĝo vi klasikmaniere implicite kulpigas katolikojn. Vi ne diras tion rekte, sed laŭ via aludo ŝajnas, kvazaŭ katolikaj kunvenoj estus plenaj de seksĝenado kaj samseksa molestado. Ne estas tiel, certe ne almenaŭ inter bonaj katolikoj. Kaj la laŭseksa disigo en tiaj aranĝoj certe kontribuas al tio, ĉar ĝi malproksimigas la ŝancon por peko. Efektive tamen kredeble eĉ pli protekte efikas la katolika moralo (kaj ne nur tiu seksa), ĉar ĝi eksplicite predikas neperforton kaj instruas pri sekskuniĝo kiel reciproke respekta amplena unuiĝo kiu apartenas nur al geedzoj. Tian aliron al ĝi tamen kredeble plejparto de la IJK-anoj ne… Legi pli »

Nekatoliko
Nekatoliko

Ŭaŭ – ”la katolika moralo”… ”eksplicite predikas neperforton”… via institucio lastatempe poiome malkaŝas longajn jardekojn de teruriga mistraktado de junaj patrinoj, dumviva sklavigo de tiaj virinoj, seksperforto de infanoj, fare de la klerikoj kaj de monaĥinoj katolikaj, sub la protekto kaj kun la plena konscio de la senpeka papo kaj ties kardinaloj.

Certe ekzistas bonkoraj katolikoj, absolute. Ne ĉiuj kulpas pri la institucio. Sed ne tedu nin per senvalora prediko pri la putra ”katolika moralo”.

Katoliko
Katoliko

Cxu vi konas la dekalogon? En gxi ja oni alvokas nur al neperforto kaj kulpigas tiujn, kiuj pekis (=faris malbonon, ekz. perforton). La tuta okcidenta socio kun sia prefero por bono al malbono estas forte influita de la idearo de kristanismo.

Kaj cxu vi iam partoprenis iun el tiuj fantomaj ”katolikaj kunvenoj”? Ili estas multaj, pli grandaj ol tiuj Esperantaj, ankaux ili okazas en spirito de internacia frateco (kvankam sen komuna lingvo), kaj la averagxa nombro de ”seksaj agresoj” inter la partoprenantoj tie certe estas malpli alta ol dum la IJK. Cxiu elektu por si mem kio al ri placxas.

Sennomulo
Sennomulo

De kia fonto vi havas ke la averaĝa nombro de seksaj agresoj estas malpli alta ol dum la IJK? Rimarku ke nur iĝis artikolo pri tio pro tio ke la organizantoj decidis ne kaŝi la okazaĵon.

Sennomulo
Sennomulo

"La TEJO-estraro volas fari ĉion eblan por eviti al la kulpulo konsekvencojn, kiuj povas sekvi el interreta publikigo, kaj tial esprimis deziron, ke ĉi tiu artikolo ne aperu."

TEJO ne estas kontraŭ informi homojn pri la problemoj de seksa ĝenado (tio estas la malo de la agado de TEJO). TEJO estas kontraŭ publikigi personajn informojn, ĉar justico devas esti farita de kompetentaj homoj, kaj ne de interretaj hazarduloj kiuj ruinigos la vivon de ĉiuj homoj enplektitaj. La frazo "La TEJO-estraro volas fari ĉion eblan por eviti al la kulpulo konsekvencojn" nur estas freneza inventaĵo de la aŭtoro de la artikolo.

Yves Bellefeuille
Popularega komentanto
Yves Bellefeuille

Efektive, la lastaj paragrafoj malkomforte kuŝas post tio kio ŝajnas esti neŭtrala rakonto pri la okazaĵoj, kaj kreas dubon pri la objektiveco de la tuto.

Kaj denove estas konfuzo estas "sekso", "seksumi" kaj "genro", pro misinfluo de la angla. 🙁

kanjo
kanjo

Eble ne temas pri konfuzo, nek miso; eble ili jam konis vian argumenton kaj intence uzis la vorton genro.

Yves Bellefeuille
Popularega komentanto
Yves Bellefeuille

Mi pensas, ke plej multaj homoj nun pensas ke la demandoj ”Kio estas via sekso?” kaj ”Kio estas via genro?” celas la saman respondon.

Eble ili pensos, ke la unua demando estas iom malnove vortumita, sed ili ne konscios, ke kiam oni ekuzis la vorton ”genro”, oni intencis, ke la du demandoj estu malsamaj.

Joxemari Sarasua
Joxemari Sarasua

Mi relegas la artikolon kaj ne povas eviti agitiĝon. Post la atako, anstataŭ denunci la agresunton al la polico, la organizantoj proponis al la viktimo “paroli pri la okazaĵo antaŭ granda grupo”. Do, la atako kaj la viktimo fariĝis alia programero de la IJK: diskut-rondo por ke homoj opiniu. Ne, ne, kaj mil-foje ne! Oni ne faru cirkon el seks-atako! Viktimo meritas respekton kaj diskretecon. Organizantojn gvidis probable bona intenco, sed bon-volo ne sufiĉas: por tiaj okazoj necesas serioza ag-proceduro kongrua kun la jaro 2018. Cetere kulpigi miksajn ĉambrojn pri la atako estas tiel profunde reakcia kiel hetero-normiga.

kanjo
kanjo

Ne surprizas, sed kolerigas min la jena frazo: "Unu persono atentigis, ke la viktimoj estas plej ofte komencantinoj, kiuj pro tiu sperto poste restas for de la movado." Kial oni ne pli vaste diskutis tion? Kial oni ne antaŭatentigas ĉeestontojn por ke ili povu gardi sin laŭeble plej bone? La frazo ne surprizas min ĉar mi bone komprenas, ke Esperantujo havas la samajn problemojn kiel la cetera mondo. Ĝi kolerigas min, ĉar tiu problemego ne estis antaŭe pli vaste pridiskutata. Mi bone memoras pasintajn diskutojn, kie aktivuloj de TEJO kaj aliaj pene klopodis diri, ke tiaj problemoj ne okazas en… Legi pli »

Krizipo
Krizipo

Mi emas dubi pri la aserto de tiu nekonata ulo: ”ke la viktimoj estas plej ofte komencantinoj, kiuj pro tiu sperto poste restas for de la movado.” Tiu ĉi aserto montras surprize multan sperton pri seksperfortitaj komencantinoj, kiuj poste ne plu aperas en la movado. Kiun gravegan rolon tiu ulo havas en kaj ekster la movado, ke ŝi aŭ li akiris tian eksterordinaran sperton? Kaj kial tiu gravulo ne jam publikigis tian gravan socian problemon? La plej verŝajna, tamen eble malĝusta respondo estas: tiu persono estas ordinara mensogulo, kiu nur volas gravigi sin mem.

kanjo
kanjo

Kial vi kredas, ke tio estas la plej verŝajna respondo? Kiel vi faris tiun konkludon?

Sennomulo
Sennomulo

Pri la statistika ĝusteco de la aserto mi ne certas, sed mi povas almenaŭ aldoni, ke mi ankaŭ estis – eĉ plurfoje – ĝenita fizike dum mia unua esperanta aranĝo. Poste, mi lernis eviti specifajn homojn, petis esti ĉiam akompanita nokte de fidindaj geamikoj por ne resti sola ktp. Tiu ŝanĝo de konduto nepris por resti en la movado kaj partopreni sekure renkontiĝojn. Kelkaj kazoj ne fariĝas alta statistika eblo, sed tamen malkovras aldonan ofte nerimarkitan problemon. Memkompreneblas, ke kiel novulo oni havas malmulte da amikoj ĉe la unuaj aranĝoj, oni sentas sin iom perdita, kvankam oni pro noveco neintence… Legi pli »

Krizipo
Krizipo

Dankon pro via sperto! Se homoj devas ŝanĝi sian konduton por sekure partopreni junularajn renkontiĝojn, tio montras efektivan socian problemon. Necesas do kampanjo por atentigi la publikon pri tiu problemo kaj forpeli perfortulojn el la movado.

Hanu Im
Hanu Im

Kial oni lin samĉambrigis ? Ĉu eblas loĝi kun nekonato?

RikRomo93
RikRomo93

Mi samopinias. Kial genokonatuloj de malsama sekso logxas kune??

Sennomulo
Sennomulo

Char ili mem elektis tion.

Sennomulo
Sennomulo

Se oni ne indikas personojn kun kiuj oni volas loghi, oni loghus kun nekonatoj.

Nomo
Nomo

> Unu persono atentigis, ke la viktimoj estas plej ofte komencantinoj, kiuj pro tiu sperto poste restas for de la movado.

Kiel chiuj memrespektaj esperintoj…

Marc Bavant
Marc Bavant

Kia bela kuko por skandalgazeto!

RikRomo93
RikRomo93

Mi havas du demandojn pri la afero:

1) Cxu la vidpunkto de la akuzita viro estis auxskultata, kaj cxu li povis sin defendi?

2) Kial icxoj kaj inoj logxis en sama cxambro? Gastigi icxojn kaj inojn en diversaj cxambroj sxajnas al mi normala prudentajxo por eviti eventualajn problemojn.

Sennomulo
Sennomulo

Kiam oni alighas al IJK oni povas (sed ne devas) indiki sian propran genron kaj oni devas indiki chu oni akceptas au rifuzas loghi en genromiksita chambro.

Sennomulo
Sennomulo

1) Jes, okazis privataj diskutoj inter li kaj la organizantoj de IJK kaj respondeculoj de TEJO.

Sola Malsamideano
Sola Malsamideano

Kial enmetu du personojn, unu viron, la alian virinon, kiuj estas nekonantaj unu la alian, kiuj ne havas bonan uzon de la sama lingvo, kiuj alvenas al du malsamaj kulturoj, dormi en la sama cxambro? Sxajnas al mi iom fusxebla situacio komence. Sed se estus mi super la situacio, mi batus la virfusxulon!

Rogier
Rogier

La sama demando aperis dum la nomita programero. Kaj la respondo estas, ke similaj aferoj povas okazi ankaŭ inter konatoj aŭ eĉ partneroj. Kaj pli grave, ili ofte okazas ekster ĉambroj: en malluma diskejo, ĉe necesejo aŭ en koridoroj. Do la ĉambrodivido ne estas la ĉefa problemo.

Yves Bellefeuille
Popularega komentanto
Yves Bellefeuille

Via komento pri batado bone montras, kial oni ne publikigu la nomon de la ”akuzito”, kaj kial oni prefere sendu tiajn plendojn al polico aŭ alia kompetenta instanco.

Joxemari Sarasua
Joxemari Sarasua

Forpelo de IJK estas tute malsufiĉa: la agresunto transdoniĝu tuj al la polico. Mi indignas legi, ke “TEJO-estraro volis eviti publikigon” kaj anstataŭe preferas vuali la aferon kaj kontentigi sin simple forsendante la agresunton de la IJK: seks-ĝeno estas krimo! Tia konduto memorigas pri la maniero, kiel la katolika eklezio pritraktas seks-agresojn en sia sino: ĝi kondamnas la kazojn, sed tenas ilin ekster la ordinara justico.

Roland Schnell

Eble vi ne rimarkis, ke la menciitaj personoj "ne havis komunan lingvon" kaj tio estus iomete stranga en Esperanto-kongreso, kie oni konstante substrekas la komunan lingvon……
Samtempe oni ne povas diri, ke komuna lingvo reduktus seksperforton. La plej lingvaj kazoj okazas inter samlingvanoj.
Mi timas, ke oni ne vere intencas kondamni seksperforton, sed volas eviti makulojn sur la brila kovrilo de Esperanto (kaj tejo, kiu avidas eksterajn subvenciojn)
La komparo kun la katolika eklezio estas trafa.

jixiang

Gxi diras en la artikolo ke la viktimo decidis ne iri al la polico, pro manko da pruvoj. Kompreneble ne estas realizme pensi ke la agresanto mem transdonigxu al la polico. Kvankam mi absolute kontrauxas seks-gxeno de kiu ajn speco, kaj mi ne dubas ke la knabino rakontis la veron, mi ankaux pensas ke estas prave ke la legxa sistemo de demokrataj landoj retenu sian bazan principon: homoj estas senkulpaj gxis oni pruvas ilian kulpon preter rezonema dubo. En kazo kiel cxi tiu estus tre malfacila. TEJO decidis forpeli la agresanto de la kongreso, kaj mi dirus ke tio estas… Legi pli »

Dubema
Dubema

Do kvazaŭ io pruvis la kulpon…

Tjeri
Ŝatata komentanto
Tjeri

Tamen, TEJO ne estas justica tribunalo sed organizanto de privata kunveno, kies bona disvolvado povas eĉ postuli forpelon de eblan senkulpulon. Temis ja pri bona kompromiso.

jixiang

Unu afero estas pruvi la kulpo en legxa kortumo. Alia afero estas ke la organizantoj de la kongreso mem decidu, sur baze de sia propra sento, kaj prenu decidon kiun tute ne havas legxan signifon.

Marc Bavant
Marc Bavant

"Forpelo de IJK estas tute malsufiĉa": Sendube. La agresinto "tenis kaj tuŝis ŝin malgraŭ ŝiaj insistaj protestoj, kaj ne permesis al ŝi formoviĝi" dum kvin minutoj. Li eĉ ne meritus proceson, sed tujan publikan ŝtonumadon kun antaŭa kastrado… "Seks-ĝeno estas krimo!": Ĉu vi certas?

Querino
Querino

Informi estas malfacila tasko kies rolo precipe temas pri lerti homojn, igi mesagxon videbla kaj transdoni al aliuloj ion lernigan. Mi bedauxras pro la okazajxo kaj pro tio, ke tiu cxi artikolo aperis en LF. Kiam oni publikigas tion, ecx kiam ne aperas nomo de iu ajn, oni malkasxas ke mankas respekto al la viktimo, al sia mensa sano kaj sia intimeco. Akraj polemikoj donas surklakojn. Kaj por kelkaj homoj, nur tio vere gravas. Bedauxrinde.

Rogier
Rogier

Saluton Querino,

Mi intervjuis la viktimon kaj ekhavis ŝian klaran konsenton por publikigi la artikolon tiel, kiel ĝi nun aperas.