Amikumu iĝas socia reto

La nova versio de la poŝtelefona aplikaĵo Amikumu ebligas afiŝadon de mesaĝoj videblaj al la cent plej proksimaj parolantoj de elektita lingvo. Tio estas la unua paŝo en evoluo, kiu celas ke Amikumu iĝu novspeca socia reto.

“La fluo” estas nova panelo en Amikumu. Tie eblas vidi mesaĝojn de la plej proksimaj samlingvanoj.

La poŝtelefona aplikaĵo Amikumu estis lanĉita antaŭ malpli ol unu jaro, kaj ĝi rapide iĝis populara inter retumemaj esperantistoj, kiuj volas trovi proksimajn samlingvanojn.

Post la apero de alilingvaj versioj ankaŭ neesperantistaj lingvemuloj ekuzis ĝin. Ĝi estis prezentita en aranĝoj por poliglotoj, kaj nun la angla jam estas la plej parolata lingvo inter Amikumanoj.

Se ne kalkuli la denaskulojn, Esperanto laŭ la statistiko de Amikumu daŭre restas la plej populara lingvo: la angla havas proksimume 5.200 negepatralingvajn parolantojn en Amikumu, dum Esperanto havas preskaŭ 7.700. Tamen pli ol duono de la Esperanto-parolantoj en Amikumu taksas sin komencantoj.

La nova versio de Amikumu, kiu ĵus aperis por Android-telefonoj, kaj baldaŭ aperos por iPhone, enkondukas gravan plibonigon. Pli frue eblis per Amikumu trovi proksimajn parolantojn de dezirataj lingvoj kaj rekte komuniki kun ili, sed nun eblas krome afiŝi mesaĝojn, kiuj iĝas videblaj al la cent plej proksimaj parolantoj de elektita lingvo.

La suma kvanto de uzantoj de Amikumu nun estas iom pli ol 10.000. Tio signifas, ke multaj el la cent plej proksimaj aktivaj parolantoj de Esperanto nun povas troviĝi eĉ sur la alia flanko de la terglobo.

Tamen, se la kvanto de uzantoj kreskos, la mesaĝoj en la "fluo" ne plu atingos la tutan terglobon. Jam nun ekzemple dum grandaj Esperanto-aranĝoj, kie troviĝas multaj uzantoj de Amikumu, mesaĝoj supozeble ĉefe atingos homojn en la kongresurbo kaj ĝia proksimeco. Tiel eblos ekzemple anonci pri okazaĵoj aŭ interkonsenti pri grupa renkontiĝo.

La “fluo” estas unua el pluraj novaj ecoj de Amikumu, kiuj igos ĝin pli simila al sociaj aplikaĵoj. Ĝi tamen ne strebas konkurenci ekzemple kun Facebook aŭ Twitter, sed proponos ion tute novan, diras Richard Delamore, la ĉefa afergvida oficisto de Amikumu:

– Neniu alia socia apo funkcias surbaze de proksimeco kaj lingvo. La kerno de Amikumu estas lingvoj kaj proksimeco. Poste, oni povas trovi iun ajn surbaze de intereso, lingvo kaj proksimeco. Necesos pli ol ses monatoj por ebligi ĉiujn sociajn funkciojn, sed ĉiumonate, ni intencas publikigi novan funkcion por plibonigi la sperton por niaj uzantoj. La fluo estas la unua ŝtupo tiudirekte.

Kiu estos la sekva nova funkcio?

– Komentado. Multaj volas la eblon facile prikomenti la afiŝon de aliaj.

  Aboni  
plej nova plej malnova plej populara
Avizi pri
Etcétera
Etcétera

Nekredeble! Cxu kredi aux ne?… “Ĝi estis prezentita en aranĝoj por poliglotoj, kaj nun la angla jam estas la plej parolata lingvo inter Amikumanoj.”
Iniciato de esperantemuloj kaj jam la angla regas gxin. Kion diri?

Andreas
Andreas

Nu, Amikumu estas ankau (chu eble ech chefe?) apo por poliglotoj. Do ne estas mirige, se en ghi regus la angla, kiel tiu chi miascie ja iel regas en iliaj renkontighoj:
https://goo.gl/W2GhEX .

Geĉjo
Geĉjo

Verdire, mi ne miras. Siatempe en Rusio oni organizadis komercajn lingvajn kursejojn kie inter aliaj estis instruita E-to. Post kelka tempo ordinare restis nure la angla — manĝi ja necesas ĉiutage ;-(
Tio estas siaspeca simptomo – E-to estas, ho ve, nekomerca afero. Kiel impliki E-to+komerco (aŭ integri la lingvon en ekonomikon) — ???

Etcétera
Etcétera

Bonvolu demandi al Szilvasi Lazslo…😉

amuzulo
amuzulo

Nu, Amikumu subtenas pli ol 7000 lingvojn. Iutage ankaŭ la hispana estos pli populara en Amikumu ol Esperanto… eblas vidi la plenan lingvan statistikon de Amikumu ĉe https://amikumu.com/eo/statistics/

Mi ĝojas, ke la neesperantista publiko jam komprenis nian servon kaj uzadas ĝin. Ĉiuj, kiuj aliĝas krome vidas, ke estas esperantistoj apude. Tio estas pruvo, ke Esperanto en la moderna mondo vivas, kiun multaj homoj daŭre ne kredas! Krome, Esperanto memkompreneble ankoraŭ estas la laborlingvo de nia teamo. Tio validas eĉ kelkfoje en niaj eksteraj rilatoj: nia tuta negocado okazis en Esperanto pri sponsorado kun Langfest (la plej granda poliglota evento en Nordameriko)!

Sebastiano
Sebastiano

Kun intereso kaj simpatio mi sekvas la sorton de Amikumu. Tamen mi klare sentis ioman malkomforton, kiam en la iam tute familiara esperanta dometo "Amikumu" enloĝiĝis aliaj homoj, kiuj ne apartenas al nia "rondo familia".

Jes jen Jens
Jes jen Jens

Tiu rondo troviĝas ene de multe pli granda rektangulo. Necesas interkontaktigi ambaŭ.

Sebastiano
Sebastiano

Mi ja scias, kial e-istoj tiom klopodas pri ne-esperantistoj — pro bonaj kaj validaj kialoj. Tamen mi fojfoje ŝatus, se ni ankaŭ foje iom pli klopodus pri la jam ekzistantaj e-parolantoj.

Jovana
Jovana

Tio donas esperojn pri la savo de UEA, kiu investis 10000 eŭrojn en Amikumu. La kreskego de Amikumu signifas/os enorman gajnon ankaŭ por UEA, kiu sekve ne devos maldungi siajn monvorajn deĵorantojn.

Licxjo
Licxjo

Eble mi ne retenos la spiradon ĝis la investo de UEA al Amikumu savos la organizon.

Mi estas dumviva membro de UEA, kaj mi devos vivi nur ĝis la aĝo de 80 por ricevi bonan valoron kontraŭ mia pago. T.e., restas nur 14 jaroj. Se la organizo ekzistos ĝis tiam, mi estos kontenta.

Sed ial mi ne kredas ke Amikumu estos parto de la solvo. Nur la paso de tempo montros tion.

Licxjo
Licxjo

Mi (al Direktoro de UEA): "Mi estas dumviva membro, kaj mi legas en Interreto pri la investo, flanke de UEA, al la aplikaĵo 'Amikumu', en la sumo de 10 000 eŭroj. Mi scivolas, kiaj estas la leĝaj aranĝoj pri tiu ĉi 'investo'? Kiom da akcioj nun posedas UEA, kontraŭ la investo? Se 'Amikumu' iam sukcesos, kiom ili finfine repagos al la asocio?" Direktoro de UEA al mi: "temas pri investo en akcioj. Same kiel ĉe aliaj akcioj oni povas gajni aŭ perdi kaj tio signifas: 0 EUR en plej malbona kazo mult-mult-oblo en bona kazo." Mi (al Direktoro de UEA):… Legi pli »

Licxjo
Licxjo

Mi scivolas, kiom da akcioj ricevis UEA kontraŭ la investo de 10 000 eŭroj en Amikumu? Kia estas la leĝa kontrakto kiu garantias repagon de la investo kontraŭ estontaj kresko kaj sukceso?

Aŭ ĉu la "investo" simple estis "donaco"? Neniu vere klarigis tion, ĝis nun.

Jovana
Jovana

Licxjo, vi bone flaris. Laŭ la jar(dek)oj UEA "investis" en "bonaj" projektoj, aŭ pruntedonis al tiaj projektoj grandajn sumojn, kiujn ĝi neniam rericevis, kaj kiuj, fine, transformiĝis en perdojn. Neniu surpriziĝu se ankaŭ ĉi-foje UEA donacis 10000 EUR al privata entrepreno, dum ĝi plendas pri manko de mono.