Prelegoj de la Malferma Tago spekteblaj
Entute ĉeestis dum la Malferma Tago 106 personoj, iom malpli ol pasintaŭtune, kiam la kvanto de ĉeestintoj estis 125.
Ĉefprelegisto en la ĉi-jara Malferma Tago estis la konata germana historiisto Ulrich Lins. Li faris superrigardon pri la historio de Esperanto en orienta Azio, precipe Japanio. La centra temo estis: kiel rilati al la modernigo - ofte: okcidentiĝo - de Japanio en la 19-a kaj frua 20-a jarcento. Laŭ li, la malŝato de azianoj kontraŭ neologismoj estis ĉiam pli forta ol ĉe eŭropaj esperantistoj - tute kompreneble, se konsideri la lingvan fonon.
En la dua prelego, priskribante sian aliron al Zamenhof, li ankaŭ kaj precipe parolis pri la ekzistanta literaturo pri la temo. Tiun interesan superrigardon sekvis priskribo de lia redaktado de la nova eldono de la "Vivo de Zamenhof", verkita de Privat en 1920.
Ziko van Dijk prezentis sian novan verkon kun la titolo "Informado praktike", kaj ĝia longa estiĝo. La nova libro priskribas praktikajn situaciojn kaj teknikojn, ekzemple konsilas pri la aspekto kaj enhavo de informiloj, pri la aranĝo de standoj kaj retpaĝoj kaj pri la interrilato kun ĵurnalistoj. Li precipe emfazis ke gravas memkritike observi sian propran sintenon kaj laŭnecese adapti ĝin. Laŭ li, informado estu ĉefe portata de pozitiva sinteno (ŝato de Esperanto), ne de negativa (ekzemple malŝato de la angla).
Aliajn verkojn aperintajn ĉi-jare prezentis Ionel Oneţ, la respondeculo de la libroservo de UEA. Laŭ li, en la jaro 2007 ĝis nun aperis jam pli ol 150 diversaj libroj en aŭ pri Esperanto.
La plej popularaj varoj en la libroservo daŭre restas diversaj lernolibroj, sed unu el la plej venditaj libroj dum la Malferma Tago tamen estis "Fraŭlino Maitreyi", romano pri malpermesita amo inter juna eŭropano kaj eĉ pli juna bengalino, tradukita de Ionel Oneţ mem.
Reprezentantoj de la projekto E@I dum la aranĝo renkontiĝis kun aktivuloj de UEA kaj TEJO por diskuti siajn retajn planojn kaj eventualan kunlaboron. La celo de E@I estas starigi profesian multlingvan informportalon pri Esperanto surbaze de la litova paĝaro www.emozaika.info.
E@I krome proponas krei la paĝarojn por UK kaj IJK en 2009. Laŭ E@I la kunordigo de tiaj retejoj de UEA kun helpo de E@I multe plifaciligus la laboron de la organizaj teamoj de UK kaj IJK, ĉar ne plu estus bezono ĉiujare rekomenci de nulo.
Dum renkontiĝo kun estraranoj de UEA iu el la publiko demandis, kiun rolon ludos la centjariĝo de UEA venontjare en la kongreso. Laŭ la respondo de Claude Nourmont, estrarano pri kulturo kaj kongresoj, la temo de la kongreso estos alia, sed la estraro ankoraŭ pensos kiel tamen enplekti la centjariĝon apude en la programo.
Dum la sekva tago, dimanĉo, okazis tuttaga seminario pri informado kun dekkvino da aktivuloj, kiun enkondukis kaj gvidis Barbara Pietrzak. Prezentojn faris Ziko van Dijk, Andrej Grigorjevskij, kaj Peter Baláž kun Jevgenij Gaus.
La vizitantoj de la Centra Oficejo povis dum la Malferma Tago ekscii pri novaj stabanoj de la oficejo. La rearanĝo de la stabo fariĝis necesa pro la forpaso de la longtempa oficisto Marvin Stanley.
Ekde la 1-a de novembro la ĝisnuna sekretario de la Centra Oficejo, Ralph Schmeits, laboras en la librotena fako. Li estas nederlandano kaj naskiĝis en 1979. Oficisto de UEA li estas ekde novembro 2005. La postenon de oficeja sekretario transprenos ekde la 1-a de decembro Katarzyna Marciniak, kiu de novembro 2006 laboris kiel volontulo de TEJO. Ŝi venas el Pollando kaj naskiĝis en 1978.
Pluraj filmetoj pri la ĉi-jara malferma tago, faritaj de Andrej Grigorjevskij, spekteblas ĉi tie:
