El Popola Ĉinio malfermis specialan retpaĝon pri la japana katastrofo
En la speciale kreita retpaĝo Tertremo kaj cunamo trafis Japanion la redakcio de El Popola Ĉinio kolektis novaĵojn pri la temo, jam aperintajn en la ordinara retejo. Aldone El Popola Ĉinio samloke kolektas la ĉiutagajn raportojn de Hori Jasuo el Japanio. Aperas multaj informoj pri simpatiesprimoj de la ĉinaj aŭtoritatoj, kaj pri ĉinaj helpaj iniciatoj.
En letero dissenditaj al diversaj adresoj la redakcio de El Popola Ĉinio klarigas, kial la retejo estis starigita:
Karaj japanaj samideanoj kaj amikoj,
Kun granda malĝojo ni informiĝis, ke la granda tertremo kaj cunamo atakis Japanion kaj alportis grandajn perdojn al via lando. Ni ĉi tie esprimas niajn simpation kaj profundan funebron al la viktimoj en la tertremo kaj konsolon al ĉiuj japanaj popolanoj.
Post la okazo de la tertremo ni ĉiam atentas pri la informoj el Japanio, kaj tiuj pri e-istoj. Ni malfermis la retpaĝaron en nia retejo (http://www.espero.com.cn/se/node_51621.htm) por kiel eble plej rapide liveri informojn pri la situacio de Japanio al samideanoj en nia Esperantujo. En la retpaĝaro ni ankaŭ aperigis la taglibron de s-ro Hori Yasuo. Ni dankas lin pro liaj rapidaj kaj detalaj informoj pri la tertremo kaj ankaŭ pri e-istoj en la plagitaj regionoj.
Per tiu ĉi letero ni kore salutas japanaj esperantistoj kaj deziras al ili, iliaj familianoj kaj la tuta japana popolo sanon kaj sekurecon!
La redakcio de El Popola Ĉinio
Aliparte, ĉar ĉe la ĉina retejo mi ne trovas iun ajn retadreson por sendi mesaĝon (tiu ĉi linio ŝajnas al mi stranga : "konstanta leĝo-konsilanto de El Popola Ĉinio: fama ĉina advokato..."), mi tamen volas diri ke viaj paĝoj pri Tibeto ŝokis min ; des pli ke tiuj paĝoj estas esperantlingve, lingvo de amikeco kaj de paco. Malfacile estas paroli pri politiko, kaj des pli malfacile estas ekkonscii pri malbonaĵoj de propra lando. Mi havis kuraĝon fari tion pri mia land'. Laŭ ĉiuj miaj informoj, Dalai Lamo estas pachomo ; militistoj perforte invadis Tibeton, kaj mortigis multajn homojn (kiel francaj militistoj faris aĉaĵojn ekz. en Algerio dum la 60aj jaroj) ; kaj eble Tibeto jam "delonge estas parto de ĉina teritorio", sed ankaŭ delonge, laŭ miaj scioj, Tibeto havis rilaton ekz. kun Mongolio...
Se estus videbla ligilon por sendi mesaĝon al vi, mi ja rekte kontaktintus vin ; sed mi ne povas elteni tiajn paĝojn, des pli esperantistajn paĝojn. Eble okazus pliboniĝoj ekde la "libereco de tiu malriĉa kaj malgajiga lando" (mia kor' disŝiras), sed... ĉu vi ne lacas esti "oficiala voĉo" ? Pripensu do pri paco, pri diferenco inter politikaj ideoj kaj popolaj sortoj... Mi tamen bele taksas ĉinan genton, malgraŭ miaj diraĵoj... Kaj daŭre salutas vin.