Betoveno kaj Auld en furora publika koncerto
de Redakcio
—
Laste modifita:
2009-08-15 08:04
Multaj kongresanoj en mardo entuziasmis pri la publika koncerto okazinta lunde vespere en la ĉefa placo de Bjalistoko. Sep poemoj de William Auld estis kantitaj kun muziko speciale komponita de la bjalistokano Max Fedorov. Poste la finalo de la 9-a simfonio de Betoveno estis kantita en Esperanto, unuafoje en la monda historio.
- Hieraŭ okazis vere nekomparebla evento. Ĉiuj partoprenantaj bjalistokanoj ĝojis, festis kaj aplaŭdis, diris kongresano Stanislav Rynduch el Germanio.
Same opiniis eksestrarano de UEA Ranieri Clerici.
- Estis vere unika koncerto, mi tre esperas ke oni filmis ĝin por posta prezento.
La esperanta teksto por la 9-a simfonio de Betoveno estis speciala aranĝita de Joanna Filipowicz-Choroszucha por kvarvoĉa koruso kaj kvar solistoj.
"La publiko estis tute ravita de la kvalito kaj de la unikaĵo mem, pompa spektaklo de postkurantaj voĉoj de violono, aldo, perkutiloj kaj ĥoro", skribis Francesco Maurelli poste en la kongresa kuriero.
Unuan fojon oni publike koncertis kaj kantis en la internacia lingvo 9-an simfonion de Ludwig van Beethoven kaj kompreneble Europa-himnon.
La artistoj ricevis grandegajn aplauxdojn ne nur de esperantistoj.Cxiuj estis ravitaj kaj dirigento diris, ke precipe por vokalistoj estas Esperanto tre konvena kaj facila.
La okazintajxo estis prezentita en kadroj de Festivalo de Kulturo, kie miloj da bjalistokanoj spektis dum tuta semajno bonegajn prezentadojn kaj cxio tute senpage. Restos por mi granda enigmo kiel oni tion povus arangxi.