Trafa renkontiĝo en internlanda brazila urbo
de Fabiano Henrique
—
Laste modifita:
2007-12-16 14:29
La 2-an de decembro okazis en Paraíba do Sul, 123 kilometroj for de Rio-de-Ĵanejro, la 70-a Esperantista Renkontiĝo de la Paraiba Valo. Ĉeestis 57 personoj el 11 urboj.
Luiz A. Coelho prelegis dum la renkontiĝo
Dum suna dimanĉo oni kunsidis por aŭskulti entute 10 prelegojn pri literaturo, historio, matematiko, medicino kaj meditado. Katolikaj esperantistoj organizis specialan kunvenon. Membroj de Asocio Esperantista de Rio-de-Ĵanejro pritraktis sian venontjaran kongreson. Oni krome kantis kaj estigis konversaciajn rondojn.
La neesperantistaj vizitantoj konatiĝis kun la esperanta kulturo. Gelernantoj de la ĵus finiĝinta baza kurso en la najbara urbo Três Rios ricevis diplomojn. Tri lokaj gazetoj informis pri la evento. La proksima Esperantista Renkontiĝo de la Paraiba Valo okazos en marto 2008, en la urbo São José dos Campos.
