Jarraporto jes, sed...
Nova renkontiĝo dum pasko: PRINTEMPE
novaĵoj
Novaĵoj el Esperantujo.
IJK 2011 en Ukrainio
La Internacia Junulara Kongreso en 2011 okazos en la ĉefurbo de Ukrainio, decidis la estraro de TEJO dum reta kunveno. Temo proponita por la kongreso estas "Stabila evoluo - nova koncepto por homaro". La aranĝo okazos julie 2011 proksime de Kijivo, ĉefurbo de Ukrainio. La organizan teamon kreos UkrEA (Ukraina Esperanto Asocio) kaj ULEJ (Ukraina Ligo de Esperantista Junularo). Tio estos la unua IJK en Ukrainio. La kongresejo troviĝas proksime de la Kijiva akva rezervejo. Ĉi-jare la Internacia Junulara Kongreso okazos en Kubo.
Teknikaj ŝanĝoj ĉe Libera Folio
Dum la eŭropa nokto inter la 2-a kaj 3-a de marto Libera Folio transiris al nova servilo kaj al nova versio de la enhav-administra sistemo Plone. Lige kun la transiro la retejo dum kelkaj horoj ne estis alirebla.
Litovaj novaĵoj en Esperanto
Esperantlingva retejo regule raportas pri novaĵoj kaj aktualaĵoj de Litovio.
Jam 12 kandidatoj sin anoncis por la elektoj de UEA
Du semajnojn antaŭ la limdato jam 12 membroj estas kandidatigitaj por konkursi pri la ses lokoj de komitatanoj B en la supera organo de UEA. Inter ili estas tri estraranoj sed nur du nunaj komitatanoj.
Esperanto.com elaĉetita por esperantista projekto
La retadreso Esperanto.com, kiu longe estis posedata de usona privatulo, estis aĉetita de esperantistoj por nova, nuresperanta socia retejo. La nova retejo estas la dua provo krei esperantistan socian retejon, post Amikumu.com, kiu funkciis dum la jaro 2007 kaj tiam atingis proksimume 1.700 membrojn. Ekde julio 2008 la paĝaro de Amikumu.com ne plu funkcias. Kelkajn tagojn post la lanĉo, la nova retejo Esperanto.com jam havas pli ol 250 membrojn. Libera Folio petis ke Dima Ŝevĉenko, denaska esperantisto kaj unu el la aktivuloj, rakontu pri la celoj de la projekto.
La patro de la eŭro ne estis esperantisto
En la januara numero de la revuo Esperanto aperis ampleksa artikolo, laŭ kiu la nomon de la komuna eŭropunia monunuo unue elpensis kaj proponis al la decidantoj de EU la konata belga esperantisto Germain Pirlot. La artikolo estas grandparte kompilita el Vikipediaj tekstoj, kaj ripetas informon, aperigitan de Pirlot mem en Vikipedio, pri lia propono sendita al la Eŭropa Komisiono en aŭgusto 1995. Ulrich Matthias esploris la aferon kaj konstatis, ke jam plurajn monatojn pli frue en la sama jaro la germana ministro pri financoj Theo Waigel komencis kampanjon por nomi la planatan eŭropan monunuon ĝuste eŭro.
Universala Kongreso 2012 okazos en Vjetnamio
La elekto de Hanojo kiel la urbo de la 97-a Universala Kongreso de Esperanto en 2012 estis la plej rimarkinda decido de la Estraro de UEA, kiu kunsidis en sia plena konsisto en la Centra Oficejo ekde la 10-a ĝis la 12-a de januaro. Ĝis la lasta momento ankaŭ la korea urbo Busan konkursis, kun alloga oferto, pri la rajto okazigi la Kongreson, sed post longa diskuto la Estraro decidis favore al la vjetnama ĉefurbo. La Esperanto-movado de Vjetnamio havas jam longan historion, sed la Universalan Kongreson ĝi gastigos por la unua fojo.
Jubileanta Tonkin ricevis festlibron en la Centra Oficejo
La 9-an de januaro en la Centra Oficejo en Roterdamo estis transdonita la festlibro eldonita honore al la 70-a datreveno de Humphrey Tonkin, unu el la plej elstaraj esperantistoj de la lastaj jardekoj. La solenaĵon ĉeestis plurdeko da esperantistoj el multaj landoj, inter ili la estraro de UEA, malnovaj kaj novaj amikoj, kolegoj kaj kunlaborantoj de Humphrey Tonkin, kontribuintoj al la impona libro.
Trifoje pri Esperanto en televidaj novaĵoj
La 150-a datreveno de la naskiĝo de Zamenhof estis tre elstare traktita de la kataluna televido. La ĉefa kanalo TV3 dediĉis sian atenton al esperanto en tri malsamaj novaĵbultenoj. Dimanĉon la 13an de decembro la tagmezaj novaĵoj en sia interreta rubriko prezentis la vivantecon de esperanto en la reto. Oni substrekis la esperantlingvan Vikipedion kiel unu el la plej grandaj eldonoj de tiu reta enciklopedio. Oni atentigis ankaŭ pri la retejo de KEA, aparte pri la lerniloj en ĝi kaj ĝia televida informilo KIS TV.
Nova ĉefo de Unesko kalkulas pri subteno de UEA
La nova ĝenerala direktoro de Unesko, la bulgara diplomato s-ino Irina Bokova sendis dankleteron al UEA pro la gratuloj, kiujn flanke de UEA prezidanto Probal Dasgupta direktis al ŝi okaze de ŝia elekto al la grava ofico. "La konfido montrita de vi al mi estos valora fonto de kuraĝigo en mia klopodado antaŭenigi, per konkretaj agoj, la idealojn kaj celojn entenatajn en la Konstitucio de Unesko", ŝi skribis.
IJK 2011 en Ukrainio
Barelo - retgazeto pri Litovio
