Komentoj forigitaj
Nova renkontiĝo dum pasko: PRINTEMPE
movado
Esperantistoj ellaboras eŭropan patriotismon
Fortan reagon precipe inter la membroj de Germana Esperanto-Asocio vekis la letero de Eŭropa Esperanto-Unio al la Eŭropa Komisiono, publikigita en la plej freŝa numero de Eŭropa Bulteno. Ankaŭ esperantistoj en Hispanio tuj esprimis sian konsternon kaj postulis klarigon. En sia alvoko al la oficialaj instancoj de Eŭropa Unio, EEU interalie asertas ke baldaŭ la plimulto de la loĝantaro en multaj landoj de EU konsistos el islamanoj, avertas pri la danĝero de kreskanta religia ekstremismo, kaj proponas ke EU postulu de Turkio enkondukon de eduko pri "eŭropaj valoroj" por "prepari la turkan popolon por kompreni aliajn kiel io bona".
Esperantistoj kolektas helpon por UEA-delegito en Haitio
La delegito de UEA en Haitio, Christine Theano, pro la tertremo perdis sian fraton kaj aliajn familianojn. Kolapsis ŝia domo kaj ŝia laborejo. La kolombia esperantisto Rubén Torres, kiu persone konas ŝin, iniciatis kampanjon por kolekti helpon por ŝi kaj aliaj esperantistoj en Haitio. Libera Folio havis retan kontakton kun Christine Theano, sed pro la katastrofa situacio ŝi ne tuj havis eblon respondi al demandoj. "Kun plezuro mi respondos dum la semajno. sed nune io ne estas en ordo en mia kapo. La situacio estas tia, ke mi ne scias kie komenci", ŝi skribis.
Esperanto kaj Eŭropa Unio: ĉu miraĝo, ĉu perspektivo?
Se morgaŭ subite Esperanto estus serioze konsiderata kiel laborlingvo de Eŭropa Unio, ĉu Eŭropa Esperanto-Unio povus demonstri la efikecon de Esperanto en la kunteksto de la lingvaj servoj de EU? Kaj ĉu la instruado kaj lernado de Esperanto estas sufiĉe evoluinta por formi kaj pretigi lingvajn profesiulojn en Esperanto? Tion demandis Humphrey Tonkin en sia verko "Lingvo kaj popolo". Tiujn demandojn kaj kelkajn rilatajn temojn esploras István Ertl en sia eseo, ĵus aperinta en la festlibro honore al Humphrey Tonkin. Li konstatas, unuflanke, ke tute ne regas inter la esperantistoj unueco de opinio rilate la strategion sekvindan en EU, kaj ke, aliflanke, mankas multo en la nuna lingva infrastrukturo de Esperanto se ĝi devus funkcii, en kazo de neceso, egalrange kun la oficialaj lingvoj de EU. Libera Folio publikigas la eseon en iom koncizigita formo, sen la piednotoj kaj fontindikoj, kiuj aperas en la libra eldono.
Eŭropo solenas jubileon de Zamenhof... en varsoviaj vendejoj
Pano, fromaĝo, sukero, kolbasetoj, robo kaj jako – interalie tiujn vortojn en Esperanto renkontis klientoj de kelkaj vendejoj en la varsovia kvartalo Muranów, kie loĝis Ludoviko Zamenhof. Ĝuste okaze de lia 150-a naskiĝdatreveno tiun ŝanĝon de etikedoj preparis Pola Esperanto-Junularo kune kun kuratorino Natalia Romik kaj Historia Muzeo de Polaj Judoj. La nomoj de produktoj plenumis funkciojn konkretajn, sed samtempe abstraktajn, ĉar ili neatendite eniris la ĉiutagan realon de loĝantoj. La reagoj de klientoj estis malsamaj, kelkaj miris pri la novaj verdaj etikedoj, dum aliaj tuj rekonis, ke temas pri Esperanto.
Miloj da eŭroj fraŭditaj de Esperanto-organizaĵo
Miloj da eŭroj senspure malaperis el la banka konto de Internacia Esperanto-Instituto (IEI) en Hago, rakontas bone informitaj fontoj. La estraro de IEI laŭ la samaj fontoj longe ne konsciis pri la liko en la konto, ĉar al ĝi estis prezentataj falsaj konteltiroj. Reprezentantoj de IEI ne respondas al mesaĝoj pri la asertata fraŭdo. Same ne respondas demandojn Atilio Orellana Rojas, la direktoro de IEI, kiu estis urĝe devigita forlasi sian postenon kaj sian loĝejon en la konstruaĵo de IEI.
Esperanto ne estas plene funkcianta lingvo
En sia populara libro pri lingvaj mitoj, la sveda lingvisto Mikael Parkvall atakas ankaŭ la aserton, ke Esperanto ne estus plenvalora lingvo. Li mem ne estas esperantisto, sed defendas la lingvon kaj la ideon kun entuziasmo, kiu povus igi tiun aŭ alian kabeemulon ruĝiĝi kaj duonvoĉe plendi pri "diablaj idealistoj". Li atentigas, ke kvin sesonoj el la monda loĝantaro ne scias la anglan. Subtenantoj de la angla anstataŭ Esperanto laŭ li implicas "ke internacia lingvo, precize kiel hodiaŭ, devas esti privilegio de elito."
Google festas la Zamenhof-tagon
Antaŭ 150 jaroj, la 15-an de decembro 1859, naskiĝis Ludoviko Zamenhof. Ne nur esperantistoj, sed ankaŭ Google solenas la festotagon. En la kapo de la ĉina, japana kaj korea versioj de la plej potenca serĉilo de la mondo aperis esperanta flago, kun ligo al serĉorezultoj pri Esperanto. La apero de Esperanta versio de la logotipo de Google ŝajnas esti rezulto de esperantista kampanjo. Simila logotipo aperis ankaŭ en multaj eŭropaj versioj de la serĉilo, kiam la 15-a de decembro atingis tien.
Per propra lingvo al paca kunvivado de etnoj
Gepatralingva edukado utilas por lernado, estas grava el la vidpunkto de homaj rajtoj, kaj eĉ helpas konservi la biologian diversecon, argumentis A. Giridhar Rao, prezentante vidpunkton de UEA en scienca konferenco pri la temo ”Defioj de etneco: la loka kaj la tutmonda”. La konferenco okazis de la 25-a ĝis la 27-a de novembro 2009 ĉe la Centro por internaciaj programoj, en la universitato Osmania en Hajderabado, Barato. Ĝi enhavis plurajn prezentaĵojn pri la malsimplecoj de etnaj identecoj kaj etnaj konfliktoj tra la mondo. Dum la lasta tago, oni aranĝis sesion pri ”Etneco trans fakoj” en kiu parolis ankaŭ A. Giridhar Rao. Libera Folio publikigas redaktitan kaj esperantigitan version de de lia interveno.
Esperanto malpermesita en germana lingvokonkurso
Ekde la jaro 1981 granda germana lingvokonkurso por lernejanoj rifuzas akcepti konkursaĵojn en Esperanto, ŝajne origine pro la iama ĉeforganizinto de la konkurso, profesoro pri la angla lingvo, kiu okupiĝis interalie pri la rolo de la angla kiel internacia lingvo. Ĉi-jare laŭ la konkursa anonco "ĉiuj lingvoj" rajtas partopreni, sed kiam la germana Esperanto-aktivulo Lu Wunsch-Rolshoven demandis pri Esperanto, li eksciis ke la malpermeso plu validas. Ĉar la konkurso nuntempe estas publike financata, li decidis iniciati kampanjon kontraŭ la diskriminacio de Esperanto. "Evidente la konkurso ne deziras havi publikan informon pri la ekskludo de Esperanto - kontraste tio estas nia intereso", li skribas en artikolo ekskluzive verkita por Libera Folio.
Edmond Privat - maniulo kiu reprezentis duoncivilizitojn?
Dum la jaroj 1923-1926 Edmond Privat, pinta pioniro de Esperanto, estis vicdelegito de Irano ĉe tiama Ligo de Nacioj. Li uzis sian pozicion por antaŭenigi Esperanton. Nur nun, pli ol okdek jarojn post la okazaĵoj, estis malkaŝita la vidpunkto de la brita registaro pri lia agado. Laŭ oficialaj dokumentoj de la brita registaro, trovitaj de Hilary Chapman, oni konsideris Iranon "duon-civilizita ŝtato". Tiaj ŝtatoj laŭ la brita vidpunkto povas doni gravajn postenojn al eksterlandanoj pro ties pli granda kompetento, sed ankaŭ pro subaĉeto. Edmond Privat laŭ la samaj britaj dokumentoj estis "maniulo" pri Esperanto, kaj tial misuzis sian pozicion por antaŭenigi lingvon kies progreso neniel rilatis al la interesoj de Irano (tiam nomita Persio).
Direktoj malaperas el la plano de UEA
Proksimiĝas al sia fino la validoperiodo de la strategia laborplano de UEA por la jaroj 2001-2010, bazita sur la mantro de Renato Corsetti: "informado, instruado, utiligado". Sub gvido de prezidanto Probal Dasgupta estis komencita la laboro por formuli novan planon. En la komitata diskutejo jam leviĝis kritikaj voĉoj, laŭ kiuj la prezentita skizo de nova strategia laborplano estas malklara kaj ne facile komprenebla. Aparte mirigis multajn la malapero de la konkretaj "agad-direktoj", kiujn enhavas la nuna plano.
UEA restarigas laborgrupon ĉe UN
En la 1970-aj kaj 1980-aj jaroj funkciis tre aktiva laborgrupo de UEA ĉe la ĉefsidejo de Unuiĝintaj Nacioj en Novjorko. Inter la pintaj agantoj tiam estis Humphrey Tonkin. Nun sub lia gvido estas starigata nova laborgrupo, kiu jam faris siajn unuajn paŝojn. Humphrey Tonkin volas ne nur pli intense informi Unuiĝintajn Naciojn pri Esperanto, sed ankaŭ pliigi la informadon al esperantistoj pri la laboro de Unuiĝintaj Nacioj. Probal Dasgupto bonvenigas la iniciaton: "Por ke oni restu ano de la monda organizaĵara parlamento, oni devas laŭtaŭge ofte aŭdigi sin, sed ankaŭ aŭskulti la aliajn."
Grafitio Esperante - laborrenkontoj en Varsovio
Grafitio pri Esperanto kaj bildaj vortaretoj desegnitaj de infanoj – jen la ĉefaj eroj de laborrenkontoj okazintaj en Varsovio. Septembre organizis ilin Historia Muzeo de Polaj Judoj kaj Pola Esperanto-Junularo kadre de la 13-a Scienca Festivalo. Dum kvar renkontiĝoj la eventon partoprenis klasoj el bazlernejoj kaj gimnazio, kaj familioj kun infanoj. La laborrenkontojn komencis Zofia Mioduszewska kaj Zofia Wóycicka el la Historia Muzeo de Polaj Judoj per diskuto pri komunikado. Tion ke malfacilas komuniki ion sen uzo de iu lingvo montris ekzerco, dum kiu partoprenantoj provis „diri” al aliaj simplajn frazojn uzante nur gestojn.
Nobelpremiito Obama akuzata pri esperantismo
La kontraŭuloj de la usona prezidento Barack Obama jam de longe akuzas lin pri socialismo, naziismo, islamismo kaj planado de koncentrejoj por nekonsentantoj. Nun aperis nova akuzo: Obama ne nur estas nazio, sed li krome intencas devigi ĉiujn usonanojn lerni Esperanton. El satiraj tekstoj, mokantaj la oponantojn de Obama, la aserto rapide migris al la arsenalo de la efektivaj kontraŭuloj de la freŝa Nobel-premiito.
Medvedev diras ”ne” al Esperanto
Se Rusio oficiale ekuzus Esperanton en internaciaj rilatoj, tio signifus libervolan fordonon de unu el la atributoj de nacia suvereneco, la propra lingvo. Tiel argumentas kontraŭ Esperanto la oficejo de la rusia prezidento Dmitrij Medvedev, responde al letero de Rusia Esperanto-Unio. En sia letero la esperantistoj esprimis sian zorgon pri la kreskanta potenco de la angla lingvo kaj pri la malhelpoj, kiujn renkontas instruado de Esperanto en rusiaj altlernejoj. La prezidenta letero respondas al komplete aliaj demandoj ol tiuj starigitaj de REU, ŝajnigante ke esperantistoj volas ĉesigi la uzon de la rusa lingvo en internaciaj rilatoj.
La monda krizo voras esperantajn projektojn
La monda ekonomia krizo malaperigis proksimume 1,5 milionojn da dolaroj el la bilanco de unu el la ĉefaj financantoj de poresperantaj projektoj, Esperantic Studies Foundation. Tial la fondaĵo ĉi-jare devis duonigi siajn elspezojn. Sekve grandaj novaj projektoj ĉi-jare ne povis estis akceptitaj por financado, kaj la rimedoj estis direktitaj al subteno de jam ekzistantaj programoj. Vicprezidanto Mark Fettes tamen jam vidas lumon ĉe la fino de la tunelo.
IJK 2011 en Ukrainio
Barelo - retgazeto pri Litovio
