”Esperantista teroristo” kondamnita en Rusio
Privedjonnaja manifestacias en Moskvo
La organizaĵo Portos estis starigita en la vilaĝo Maŝkovo apud Moskvo en la jaro 1991 de Jurij Davidov, kiu ellaboris ĝeneralan "teorion de feliĉo". Por atingi plenan feliĉon la membroj de la sekto estis devigitaj verki poemojn, protokoli siajn misfarojn en kajeroj, kiujn oni nomis "ekstera konscienco", kaj studi Esperanton.
Almenaŭ pri la lasta tasko la sektanoj sukcesis malbone, atestas Moskvaj esperantistoj, kiuj dum la aktiva tempo de la sekto kelkfoje renkontis grupojn de la sektanoj en la lokaj Esperanto-kluboj. La "feliĉuloj", kiel esperantistoj eknomis la grupon, plej ofte konis nur kelkajn Esperantajn vortojn, kaj nur malmultaj kapablis efektive uzi la lingvon.
Tamen la rilato de la sekto al Esperanto estis intima, kaj tion regule mencias ankaŭ neesperantistaj amaskomunikiloj, ekzemple Global Post, kiu ĵus raportis pri la temo. La plu ekzistanta retejo de Portos daŭre havas kelkajn tekstojn en lama Esperanto kun kurioza ortografio, supozeble kaŭzita de la fakto, ke en Sovetio oni por komputile komposti tekstojn en Esperanto ofte uzis specifajn tiparojn, en kiuj la literoj q, w, y kaj x estis anstataŭantoj resp. de ĝ, ŝ, ŭ kaj ĉ. Jen unuaj punktoj de la programo de Portos:
"Sub la sankta signo de l'Espero".
Ni bezonas Homecan Patrujon por la Felixa Popolo!
Ni instruas xiujn ajn:
1. Altefekte labori kune kun ni por 16 horoj tage – kontraypeze babiluloj; vanbojuloj, nenifaruloj kaj parazitoj, disruinigantaj de Landon.
2. Atingi kaj antayvene Usonon lay la nivelo de la laborproduktivo, lay la nivelo ekonomia, milita kaj intelektula potenco.
3. Zorge kaj efektive kunlabori kun la uniqo el veteranoj de milito kaj laboro (la Prezidanto de la unuiqo estis Heroo de Sovetuniono, Vera Homo Alekseo Maresjev).
En la jaro 2000 la polico sturmis la ejon de Portos kaj arestis Jurij Davidov kaj kelkajn aliajn aktivulojn. En la ejo oni trovis junulojn el Ukrainio, kiuj laŭ la rusiaj aŭtoritatoj estis enfermitaj tie kontraŭ sia volo, kaj regule punataj pro iliaj asertataj misfaroj. Krome estis trovita deko da ĉasistaj pafiloj kaj aliaj armiloj. Laŭ membroj de la organizaĵo la armiloj ne estis kontraŭleĝaj, kaj la junuloj libervole restadis en la ejo.
En la jaro 2002 du el la gvidantoj estis kondamnitaj je mallibereja puno. Du aliaj, inter tiuj la fondinto Jurij Davidov, estis senditaj al deviga flegado en mensmalsanulejo. Davidov forpasis en septembro 2009.
En la jaro 2004 estis kondamnitaj pliaj du sektgvidantoj, unu al du jaroj en malliberejo, alia al kondiĉa puno. Tio ne malhelpis aliajn aktivulojn de la grupo partopreni la Universalan Kongreson de Esperanto en Pekino, kie ili interalie fotiĝis kun Renato Corsetti kaj portis la flagon de Portos al la Granda Muro.
La flagon de Portos - kun verda stelo - uzis ankaŭ la homrajtaj aktivuloj, kiuj ĉi-semajne manifestaciis en centra Moskvo, atendante la verdikton kontraŭ Julija Privedjonnaja. Laŭ ŝia advokato Miĥail Trepaŝkin la tuta jura proceso kontraŭ Julija Privedjonnaja estas dubinda, ĉar mankas pruvoj pri ŝia kulpo, kaj ĉar ŝi estis arestita plurajn jarojn post la asertitaj krimoj.
La rusa polico siavice asertas, ke Julija Privedjonnaja estis arestita nur en la jaro 2008, ĉar ŝi ĝis tiam kaŝiĝis, dum ŝi mem diras, ke ŝi neniel kaŝiĝis, sed male eĉ multfoje estis intervjuita en radio kaj gazetoj.
Ŝi kontentas, ke ŝi ne devos nun reiri al malliberejo, kie ŝi jam pasigis kelkajn monatojn dum la akuzo estis pritraktata, sed ŝi intencas apelacii al pli alta instanco, ĉar ŝi ne konsideras sin kulpa, ŝi klarigis al rusaj amaskomunikiloj marde posttagmeze.
Deĵorantaj intelektuloj de nia movado ne tro cerbumu kial la tiel nomata "ekstera mondo", tio estas, la stultuloj kiuj ne akceptas Esperanton, foje laŭte primokas nin.