UEA ĉesigas kontakton kun Gbeglo Koffi

Gbeglo Koffi estas antaŭa estrarano de UEA, sed konfliktas kun la asocio ekde la dua jarduono de 2005, kiam la estraro de UEA ne plu volis daŭrigi la favorajn kondiĉojn de la Afrika Oficejo de UEA, gvidita de Gbeglo Koffi. Tiam la intimaj rilatoj inter li kaj la Esperanta Civito kaŭzis multan kritikon en la komitato de UEA. Ankaŭ la prisilentata demisio de unu el la afrikaj oficistoj tiam mirigis komitatanojn de UEA.

La kontrakto kun la Afrika Oficejo de Gbeglo Koffi, finance favora al li, ne estis renovigita de UEA, kaj ekde tiam Gbeglo Koffi per diversaj minacoj, kun publika instigado de la Esperanta Civito, klopodas influi la gvidantojn de UEA.

La insistaj postuloj de Gbeglo Koffi dum longa tempo temis pri monprunto donita de UEA al la projekto Indiĝenaj Dialogoj dum la periodo kiam li mem estis estrarano de UEA. La prunto neniam estis repagita pro la malsukceso de la projekto, kaj kvankam estis nenio sekreta pri la afero, Gbeglo Koffi minacis "malkaŝi" ĝin, se la estraro de UEA ne plenumos liajn postulojn.

Pri siaj minacoj al la estraro Gbeglo Koffi mem rakontis en la diskutejo de la komitato de UEA, en mesaĝo al la tiama ĝenerala sekretario de UEA, Ulla Luin:

- Certe vi memoras miajn minacojn al la estraro pri tiu prunto. Ekde oktobro 2005 mi minacis publikigi la aferon, se vi... Certe vi memoras, ĉu ne?

De tiam Gbeglo Koffi multfoje levis la temon de la malnova monprunto en la diskutejoj de UEA, sed ne sukcesis konvinki la membrojn aŭ la komitatanojn pri sia praveco. Sian plej freŝan provon li faris dum la Universala Kongreso en Roterdamo, sed daŭre sensukcese.

Post sia fiasko en Roterdamo Gbeglo Koffi ŝajne perdis la esperon pri la monprunta intrigo, kaj anstataŭe intensigis siajn provojn ĵeti koton - unue en privataj kaj poste ankaŭ en publikaj mesaĝoj - sur unuopajn  oficistojn de UEA per krudaj kalumnioj pri seksa orientiĝo al li ne plaĉa.

La intensiĝanta kalumnia kampanjo flanke de Gbeglo Koffi fine gvidis al elpaŝo de la prezidanto de UEA. En letero sendita al ĉiuj estraranoj kaj komitatanoj de Unuiĝo Togolanda por Esperanto (UTE), Probal Dasgupta skribis interalie:

Temas ne nur pri lezo de la principo distingi en publika komunikado inter publikaj kaj privataj temoj, sed pri malobservado de tute bazaj principoj de la deco – tia malobservado, kiun la juro rigardas kiel vortan agresadon. Pro tio, ke Koffi Gbeglo uzis iujn esprimojn severe trans la limoj de la interkultura konduto, nun ĉiuj estraranoj de UEA unuanime kaj insiste petis min skribi al vi.

Li atentigis, ke pro la neakceptebla konduto de Gbeglo Koffi, UEA ne plu povos labori kun li, kaj ke la cirkonstancoj malutilas ankaŭ al la rilatoj inter UEA kaj ĝia landa asocio en Togolando, UTE:

[P]or ke la inter-organizaĵa komunikado inter UTE kaj UEA plue funkciu, necesas paŝoj de la flanko de UTE rilate la okazintaĵojn. Minimume, UTE formale sin distancigu de la uzo de tiaj esprimoj fare de la komitatano A, kiu reprezentas la Unuiĝon antaŭ nia Asocio. Preter tio, se UTE rekonsideros lian rolon kiel komitatano A reprezentanta UTE en la komitato de UEA, tio eĉ pli pozitive efikos sur la rilatojn inter la du organizaĵoj.

Responde al demandoj de Libera Folio, Probal Dasgupta klarigis, ke kvankam UEA laŭ la publika deklaro "ne plu povos labori kun li", la asocio ne plene interrompos sian komunikadon kun Gbeglo Koffi.

- Dum li restas komitatano, UEA certe havas komunikajn devojn al li ene de la asocio, kaj UEA skrupule observos siajn regulojn. Se li ĉesos esti komitatano, denove, UEA ne planas emisii oficialajn ukazojn por ekskomuniko el ĉio alia.

Cetere Probal Dasgupta ne volis komenti sian publikan leteron, klarigante, ke ĝi estas formulita en maniero komune interkonsentita de la estraro, kiu provas agi laŭeble kohere kaj unuvoĉe en delikata afero.

Laŭ la regularo de UEA, membro kiu "evidente kontraŭlaboras la celojn de UEA, morale aŭ materie damaĝas ĝin" povas esti eksigita. Decidon pri eksigo de ordinara membro faras la estraro, sed kiam temas pri komitatano, kia estas Gbeglo Koffi, por eksigo necesas decido de la tuta komitato de UEA. Do, eĉ se la estraro konsiderus, ke Gbeglo Koffi morale damaĝas la asocion, eksigi lin povus nur la komitato, kiu kunvenas nur dum Universalaj Kongresoj.

La tekstoj de Gbeglo Koffi, rekte kaŭzintaj la fortan reagon de UEA, aperis en la bulteno Konsciu la 18-a septembro. La bulteno laŭ sia mempriskribo estas "Informilo por enprofundiĝi en la E-movadon Afrikan".

Libera Folio petis komenton ankaŭ de Gbeglo Koffi mem, sed ne ricevis respondon.