Jam mil voĉdonintoj en la elektoj de UEA
de Kalle Kniivilä
—
Laste modifita:
2004-06-27 00:34
Unu monaton post la dissendo, pli ol mil voĉdoniloj pri Komitatanoj B de UEA revenis al la Centra Oficejo de UEA en Roterdamo. Ĝis la 15-a de junio alvenis 940 kovertoj, sed la nombro da balotiloj estas konsiderinde pli granda, ĉar multaj kovertoj enhavas pli ol unu balotilon. Oni taksas en la Centra Oficejo, ke almenaŭ 20 procentoj el la membroj jam voĉdonis.
La voĉdonado plu daŭras. Validaj estos la balotiloj, kiuj atingos la
Centran Oficejon plej laste la 30-an de junio. La fina nombro de
la voĉdonintoj laŭ la takso de la Centra Oficejo verŝajne estos
1500-1600. Tio signifus, ke la balotaktiveco estus pli-malpli kiel en
2001, kiam voĉdonis 1887 membroj. Tio egalis al 31 procentoj el la
membraro. La ĝisnuna rekordo, atingita en 1998, kiam voĉdonis
2328 membroj (34%), verŝajne plu eltenos. Por superi ĝin necesus
partopreno de almenaŭ 1750 membroj. (fonto: GK UEA)
