Falsaj nomoj kaj veraj trompoj
Mi estas aktiva esperantisto ekde 1947 kaj bone konas la Esperantan mondon. Ĉar reaperas de tempo al tempo la farso "Civito", mi deziras klarigi jenon.
Tiun organismon elpensis mia samlandano, kies vera nomo estas Valerio Ari (li neniam uzas sian veran nomon, sed ĉiam kaŝas sin malantaŭ dekon da falsaj nomoj kiel Giorgio Silfer, Noor Weg, Vanov, MG, Asterisko, HeKo, blanka listo, verda listo, kaj tiel plu, krom sigloj de amaso da surpaperaj asocioj de li fonditaj), de mi persone konata, kies viktimo ankaŭ mi estis. Valerio Ari ne estas membro de Itala Esperanto-Federacio nek de UEA kaj principe rifuzas viziti la UK-ojn, kiujn la edzino Perla skribe difinis "nur ĉarmaj turismaj aranĝoj".
La "Civito" estas blufo kaj tial kompromitas Esperanton antaŭ la ekstera publiko: malantaŭ ĝi, ĝiaj surpaperaj societoj kaj pompaj organoj ("suverena ŝtato, senato, tribunalo, kapitulo", "fakultato" kaj simile) troviĝas nenio. Tuj post ĝia apero la revuo de UEA publikigis artikolojn de la interlingvisto D-ro Blanke (Germanio) kaj de Prof-ino Urueña (profesorino pri juro en la universitato de Valladolid, Hispanio), kiuj klarigis, ke la ekstera mondo - kiu jam juĝas la esperantistojn malseriozuloj - ridos ke kelkaj privataj personoj deklaras sin mem "suverena ŝtato", egalranga al veraj ŝtatoj rekonitaj de la internacia juro (ekzemple Usono, Ruslando, Ĉinio).
La "Civito" volas anarkiisme detrui UEA-n, kiu, kune kun siaj aliĝintaj kaj kunlaborantaj fakaj asocioj, estas simbolo de la de li atakata vertikala movado: tiun celon, unue proklamitan en la privata rezolucio de Valerio Ari en Raŭmo (kompletigita en Szeged), transprenis la "Civito" de la sama Ari. Pri la dirita celo vi povas legi en la deklaro "Heroldo Komunikas n-ro 70, " subskribita de "civitano Żelazny, membro de la Evolu-Komisiono de Civito".
En 1996 Ari proponis ankaŭ al mi subfosi UEA-n, por li simbolo de la "vertikala movado", kiun li volas anstataŭi per sia "horizontala movado". Per "Heroldo" Ari senĉese, senhalte dividas la esperantistojn per polemikoj, kvereloj kaj skandaloj, ruze kaŝas la malvenkojn de "Civito" kaj de la apudaj fantasmaj asocioj (eksiĝoj, distanciĝoj, amasa perdo de abonantoj, mizera partopreno en aranĝoj, kaj tiel plu), ĝoje reliefigas kaj ŝveligas malfacilaĵojn de UEA sed akurate silentas pri ĝiaj sukcesoj. Kion konkrete faris tiu "Civito" por la disvastigo de Esperanto en la lastaj naŭ jaroj?
Pri la senskrupula perfido al la lasta skriba volo (de Ari akceptita) de mia edzino Ada Sikorska, kiu dum 34 jarojn redaktis la gazeton Heroldo, kaj pri miaj supraj asertoj legu miajn broŝurojn La strategio de Esperanto en la nova jarmilo kaj La lastaj tagoj de Ada, Aduŝka. Mi sendos retpoŝte al ĉiu petonto la dokumentojn pri la transdono de Heroldo: post la nuligo de la transdono fare de la tiama eldona societo, Heroldo estas nun eldonata pirate.
Mia konsilo: estu singardaj pri la allogoj de la "Civito"/Ari por eviti damaĝi al Esperanto kaj al ĝia movado; kaj por eviti esti mem trompitaj.
G. C. Fighiera
Honora Membro de UEA
Vi skribas: "La
Civitovolas anarkiisme detrui UEA-n."Kiel "anarkiisme"? Esperantio havas, kvankam ne anarkiisman ĉefideologion, tamen anarkian ĉefstrukturon, ĉar mankas en ĝi centra potenco. La "Civito", aliflanke, havas - aŭ ŝajnigas havi - strukturon hierarkian, ŝtatsimilan. Do ĝi, laŭ mia modesta opinio, provas subfosi la anarkion de Esperantio, kaj se ĝi volas detrui UEA-n ĝi faras tion arkiisme, ne an-arkiisme.
Gunnar Gällmo