Nova promeso pri Esperanto ĉe Change.org

(mi petas vastan disvastigon de tiu cxi komuniko, precipe en retlistoj nordamerikaj kaj rilataj al instruado/lernado)

Karaj samideanoj,

kvankam nia venko ĉe Change.org jam estas okazinta fakto, laboro tie daŭras plu. Change.org estas paĝaro por aktivuloj, kaj konkretaj agoj ĉiam estas en ĝia fokuso. Inspirita de nia propono pri instruado de Esperanto kaj spirite laŭ la "dekmiliona publika promeso" de Ludoviko Zamenhof, unu el membroj de Change.org, Renata Ventura el Usono, lanĉis ago-alvokon ĉe Change.org:

http://education.change.org/actions/view/study_esperanto_10_minutes_a_day_and_become_a_world_citizen

En ĝi s-ro Ventura proponas al ĉiuj lerni Esperanton 10 minutojn ĉiutage, dum 4 monatoj, por bone ellerni la lingvon. La propono estas superbe formulita kaj ligas al video de la karmemora Claude Piron. Komentoj al tiu ago-alvoko promocias, interalie, lernu.net, brazilan Kurson de Esperanto kaj edukado.net.

Tamen, ĉi-momente nur ĉ. dudek personoj akceptis la defion. Mi opinias ke estas bona oportuno kaj grava tasko por ni, esperantistoj (precipe en Norda Ameriko kaj anglalingvaj landoj), levi tiun ĉi alvokon kaj disvastigi ĝin al:

1) jam ekzistantaj membroj de Change.org (oni povas alskribi tiujn pozitive komentintajn al nia ideo sur http://www.change.org/ideas/idea_comments?idea_id=introduce_esperanto_as_a_foreign_language_subject_in_schools )

2) anglalingvaj konatoj, amikoj, kolegoj, kiujn oni povas inviti aliĝi al la promeso, registriĝinte ĉe Change.org

Mi ankaŭ ŝatus rekomendi komplimenti s-ron Ventura pro lia ideo per persona (privata) mesaĝo ĉe Change.org kaj deziri al li sukcesan lernadon de Esperanto.

Kore kaj kunlabore,

Oleg Izyumenko

P.S.: Hodiaŭ mi ricevis retleteron de du miaj samurbanoj - franca kaj usona studentoj - kiuj, inspiritaj de tiu alvoko, kune komencis lerni Esperanton duonhore ĉiuvespere.