Enric Baltasar nova prezidanto de TEJO

Malfrue merkrede vespere la komitato de TEJO elektis novan estraron de la asocio por la venonta jaro. Kiel prezidanto estis elektita Enric Baltasar, kies oficiala nomo estas Pau Codina.

Kvar el la novaj estraranoj de TEJO ĉeestis en la IJK en Aneho. Foto: TEJO.

La elekta komisiono de TEJO rekomendis, ke la komitato elektu naŭmembran estraron, por eviti ke malmultaj estraranoj havu tro da taskoj. Laŭ la elekta komisiono en la lasta estraro la estraranoj estis “superŝarĝitaj”.

La komitato de TEJO ja grandigis la estraron iom, sed ne tiom – la nova estraro havas sep anojn, du pli ol la antaŭa.

Kiel prezidanton la elekta komisiono rekomendis Enric Baltasar el Hispanio, la antaŭan estraranon pri merkatiko, kunlaborado pri informado kun UEA kaj landa agado. Tiun rekomendon la komitato sekvis.

Por la posteno de kasisto la komitato, same laŭ la rekomendo de la elekta komisiono, elektis Bui Mung el Vjetnamio.

Al la posteno de ĝenerala sekretario ne estis elektita Carlos Pesquera, kiel rekomendis la elekta komisiono, sed Hoan Tran (Ĝojo) el Vjetnamio. Pesquera kaj la antaŭa ĝenerala sekretario Arina Osipova, kiun la elekta komisiono rekomendis por la posteno de estrarano pri kongresoj, tute ne estis elektitaj.

Kiel unua vicprezidanto estis elektita Konstanze Schönfeld (Tuŝka) el Germanio. Ŝin la elekta komisiono rekomendis kiel estraranon pri subvencioj.

Kiel dua vicprezidanto estis elektita Francesco Maurelli. Li laŭ la dokumentoj de la elekta komisiono loĝas en Germanio kaj estis rekomendita por la posteno de estrarano kun respondeco pri eksteraj rilatoj kaj rilatoj kun UEA.

Kiel ordinaraj estraranoj estis elektitaj Charlotte Scherping Larsson el Germanio kaj Doniben Jiménez Jaramillo el Kolombio.

Kvar el la sep novaj estraranoj de TEJO ĉeestis en la IJK en Aneho. Neniu afrikano kandidatis al la estraro, kiu estis elektita dum la unua afrika IJK.

La oficperiodo de la estraranoj de TEJO nun estas nur unu jaro. La decido pri la duonigo de la oficperiodo de la estraro estis farita en aprilo, dum la IJF, sen antaŭa diskuto. La propono estis sendita al la komitata listo unu tagon antaŭ la komitata kunsido, kaj la decido poste ne estis publike diskonigita.

Lasi respondon

9 Komentoj pri "Enric Baltasar nova prezidanto de TEJO"

Avizi pri
avatar
2000
Ordigi laŭ:   plej nova | plej malnova | plej populara
Francisco Javier Moleón
Gasto
Ni vidu: 1. Francesco Maurelli ĵus iĝis vicprezidanto de TEJO. 2. Francesco estas direktoro kaj posedanto de la firmao Kosmo, kiu "de jaroj provizas servojn al Tejo en la kampo de subvencipetado kaj mastrumado" (http://bit.ly/2fuH6md). 3. TEJO kaj Kosmo subskribis 30.7.2017 "kontrakton pri kunlaboro" (http://bit.ly/2vRC0qC), kiu memevidente signifas rektan aŭ nerektan pagon de TEJO al Kosmo pro faritaj servoj. Do estrarano de TEJO decidos pri pago al propra firmao. Ĉu tiu ĉefplado ne sufiĉas por elstarigi ŝokan intereskonflikton? Ni aldonu iom da pipro: 4. Sara Spanò estas la edzino de Francesco. 5. Sara estas estrarano de UEA. 6. Sara estas,… Legi pli »
Zlatko Tišljar
Gasto

Chu tia TEJO kies estrarmandato estas nur unujara (dume ghi eventuale kunsidas unu fojon, char ja parto de la estraro estas en Vjetnamio) estas entule agkapabla? La sendependeco de TEJO, kiun mi principe subtenas – ja la pli juna generacio devas esti sendependa por povi enigi novajn ideojn en la movadon), signifas nenion, se la organizo ne estas efika kaj profesinivela.

hxocxjo
Gasto

Mi konsentas kun vi, Francisco.

Mi aldonus ke la etikaj problemoj rilate al subvencioj jam venas de longe http://www.liberafolio.org/arkivo/www.liberafolio.org/2012/eu-mono-gutas-en-verdajn-posojn/

Estas evidente ke Maurelli devus demisii .
Mi sxatus se oni ankaux rezignus pri subvenci-cxasado, sed eble mi tro petas…

dennis keefe
Gasto
La komentoj de Francisco pri intereso-konflikto bezonas la urĝan atenton de la Universala Esperanto-Asocio. Ankaŭ la komentoj de Zlakto urĝe diskutindas speciale kadre de TEJO. Intereso-konflikto povas estigi profundajn problemojn rekte por TEJO, kaj sekve por UEA. Kaj unujara mandato de TEJO-anoj ne kapabligos eĉ tre kompetentajn homojn, kiaj Enric Baltasar, kiuj devas labori kun longdaŭraj planoj (multe pli ol unu jaro) pri subvencioj kaj strategio. Tri jara plano, unujara mandato — tio ne kongruas. En UEA estas tri kategorioj de komitatanoj: A, B kaj C, ĉu ne? Laŭ mia scio, A-komitatanoj plejparte reprezentas landojn kaj gravajn asociojn (ILEI, ISAE,… Legi pli »
simonet.noel
Gasto

:- ) La komento de Francisco kontraŭ Amiko Rudy bezonas urĝalfabetatento.

Rudy
Gasto

kia babilado … 3 respondoj kaj 3 malsamaj ortografioj. La x- kaj H- metodo estas malamikoj de Esperanto. Ne estas kialo por uzi ĝin eĉ nun! Ĝi igas Esperanton nur malfacila kaj konfuza por komencantoj. Universala lingvo kun tri ortografio!! … pfff!

Francisco Javier Moleón
Gasto

Vi sukcesis verki unu el la plej absurdaj reagoj de la lastaj jaroj. Se konsideri la oftan kaj profundan absurdecon de multaj reagoj, tio estas ne malatentinda atingo.

wpDiskuz