Akra konflikto inter TEJO kaj UEA

La divorco de TEJO kaj UEA eniras ŝtorman fazon. La ĝenerala direktoro de UEA malpermesis al TEJO-volontuloj paroli kun laborantoj de UEA, asertas la prezidanto de TEJO.

Dum la komitata kunsido de TEJO en aprilo oni akuzis la Centran Oficejon pri "rekta sabotado" de TEJO, ĉar la nova statuto de la sendependiĝanta junulara sekcio de UEA daŭre ne estis registrita ĉe la nederlandaj oficialaj instancoj. Poste la statuto fine estis registrita, sed evidente restas grandaj problemoj en la rilatoj inter la estraro de TEJO kaj la Centra Oficejo.

– La situacio inter UEA kaj TEJO parte malblokiĝis pro la ekhavo de jura personeco. Tio ebligis al ni malfermi bankokonton kaj danke al tio TEJO povas mem elpagi monon sen dependi de la Centra Oficejo, kiu post 8-taga pretekstumado de la ĝenerala direktoro efektivigis la petitan ĝiron de parto de la rimedoj de TEJO de la UEA-kontosistemo al la nova bankokonto de TEJO, rakontas la prezidanto de TEJO, Michael Boris Mandirola.

Tamen UEA daŭre ne permesas, ke respondeculoj de TEJO rekte aliru la datumbazon de la asocio ekzemple por vidi la staton de la kontoj de TEJO, li aldonas.

– Krome la kunlaboro kun UEA bedaŭrinde malboniĝas. La ĝenerala direktoro malpermesas kontaktadon inter la stabo de UEA kaj tiu de TEJO, eĉ inter la volontuloj de la CO, por eviti ke la kunlaboro povu funkcii malgraŭ la problema rilato inter ŝi mem kaj la aktivuloj de TEJO.

Ne nur la prezidanto de TEJO, sed pluraj aliaj fontoj asertas, ke la volontuloj de TEJO en la Centra Oficejo ne plu rajtas paroli kun laborantoj de UEA pri oficaj aferoj. Tion spertis ankaŭ oficistoj de UEA, al kies demandoj TEJO-oficistoj respondis, ke ili ne rajtas paroli.

Libera Folio sendis al ĝenerala direktoro Veronika Poór demandon pri la asertata malpermeso. Ŝi ne respondis, sed sendis la demandon al prezidanto Mark Fettes, kiu respondis jene:

– Kompreneble tiu informo estas komplete erara, kaj la ideo en si mem estas absurda. Aliflanke estas ja tiel, ke mi petis al Veronika diri al la oficistoj, ke TEJO-estraranoj ne rajtas doni laboron al ili sen ŝiaj scio kaj permeso.

Libera Folio: Tamen laŭ fontoj de Libera Folio, volontuloj de TEJO ne plu rajtas paroli kun UEA-oficistoj pri oficaj aferoj, sed ili ja rajtas paroli pri personaj aferoj. Ĉu povas temi pri ia miskompreno?

Mark Fettes: – Jes, klare okazis miskompreno. Verŝajne temas pri la peto de Veronika, ke la volontuloj de TEJO ne transdonu taskojn (de TEJO) al la oficistoj, konforme al mia ĝenerala peto ke tia taskigo okazu nur tra ŝi.

Kvankam la ĝenerala direktoro ne trovis tempon respondi la demandon de Libera Folio, ŝi ricevinte ĝin trovis tempon skribi retmesaĝon al ĉiuj laborantoj en la Centra Oficejo por atentigi, ke ŝi ja neniam faris tian malpermeson, kaj por miri, de kie povis aperi tia “supozo”.

La konflikto inter TEJO kaj la ĝenerala direktoro de UEA ekbolis ankaŭ en la diskutejo de la komitato de UEA, kie Boris Mandirola esprimis sian malkontenton pri la laboro de Veronika Poór:

– Poór Veronika estas granda problemo kiu signife preteriras la rilatojn inter TEJO kaj UEA. […] Indas ke la Komitato sciu ke duono de la teamo kiu laboras por la renovigo de la retejo de UEA, devis forlasi la laboron pro maleblo kunlabori kun la Ĝenerala Direktoro kaj pro ŝia persekuta sinteno. Kaj kompreneble sekve okazis neniu malferma alvoko por anstataŭi ilin, tiel ke la publiko ne sciu pri la problemoj.

La kontrakto de Veronika Poór kiel ĝenerala direktoro laŭ Michael Boris Mandirola komence devis esti farita por unu jaro kaj poste renovigita. Tamen, poste la estraro de UEA fakte faris senliman laborkontrakton kun ŝi.

Tiajn kontraktojn UEA antaŭe ne kutimis fari kun siaj oficistoj, sed laŭ prezidanto Mark Fettes estas nenio eksterordinara pri la kontrakto de Veronika Poór:

– Lau la leĝoj de Nederlando, kiuj ĝenerale estas tre favoraj por dungitoj, se oni laboras tri jarojn por iu dunganto la posteno iĝas konstanta. Do la demando estis nur, ĉu fari kontrakton por malpli ol tri jaroj, kaj ni decidis, ke ne indas por tia posteno kiel Ĝenerala Direktoro. Estas la kutimaj kondiĉoj pri eventuala ĉesigo de la kontrakto fare de unu flanko aŭ la alia, kaj krome estas ĉiujara pritaksa kunsido kun la Prezidanto kaj eventuale aliaj estraranoj.

– Ĉar ĉiuj aliaj oficistoj de UEA laboris en la CO jam pli ol tri jarojn, ĉiuj nun havas kontrakton de nelimigita daŭro.

Libera Folio: Sed kiam tio okazis? Ĉu la kontrakto komence ne estis unujara?

– La kontrakto kun Veronika estas por nelimigita daŭro dekomence. Tio ne signifas ke ni ne povas ĉesigi ĝin – ni povas fari tion iam ajn kun trimonata averto – sed oni ne dungas Ĝeneralan Direktoron por nur unu-du jaroj, do unujara kontrakto simple ne havus sencon.

La respondoj de Mark Fettes pri la kontrakto de Veronika Poór estis aldonitaj je 20.30 laŭ la mezeŭropa somera horo. Laŭ liaj informoj estis samtempe korektita la aserto, ke komence temus pri unujara kontrakto.

Ordigi laŭ:   plej nova | plej malnova | plej populara
Gecxjo
Membro

Triste estas, karuloj!
Havi saman lingvon kaj ne amike interrilati, des pli – celoj samas.
Damna financa malbonfarto … !!!

dennis keefe
Gasto
(Mi alivortumas mian reagon al antaŭnelonga artikolo de Komitatano Z en la Balta Ondo http://www.sezonoj.ru: Tie mi parolis pri la graveco kompreni nian movadon en la kunteksto de aliaj internaciaj organizoj. Sube mi fokusiĝas sur la nuntempa, akra, tro boliganta krizo de TEJO-UEA). Unu el miaj perspektivoj pri la TEJO-UEA konflikto estas, ke antaŭ ĉio valorus studi la membro-sistemojn de ALIAJ internaciaj organizoj. Ne validas la argumento, ke UEA kaj TEJO, pro Esperanto, estas tute apartaj, nekompareblaj organizoj. Aliaj internaciaj asocioj havas konfliktojn, leĝo-disputojn, alstrebo al prestiĝo-postenoj. Tiuj organizoj havas ankaŭ estrarojn, enspezojn kaj elspezojn, buĝetojn, membrojn, membro-kotizojn, konferencojn, kongresojn,… Legi pli »
TONY SAR
Gasto

Ĉu TEJO fariĝis TUTMONDA ORGANIZO DE POLITIKEMAJ JUNULOJ??? (Kaj subvenciopetantoj??) Ne temas pri informo: NUR ESTAS DEMANDO.

Cindy McKee
Membro

Iom pli da informoj en nova komento ĉe la grupo Komitato de UEA: "la datumoj de TEJO estas samtempe niaj datumoj." –Mark Fettes.
Li diras ankaŭ, ke TEJO ne volas observi la datum-protektan politikon, sed volas kunhavigi ĝin kun jure apartaj Landaj Sekcioj.
Li daŭras, por diri: "Do, nepras havi komunan datumprotektan politikon por eviti tiajn konfliktojn."
https://groups.yahoo.com/neo/groups/komitato-de-uea/conversations/messages/10231

Szilvási László
Gasto

TEJO iĝis jure memstara kaj sendependa, sed daŭre melkas la patrinan organizon. Ĝi volas uzi la datumbazon, la oficejan domon, la oficejan aparataron, laboradon de UEA-dungitoj, postulas monon – sed mi ne vere komprenas, kion ĝi donas por UEA – krom la belaj pufaj sloganoj kaj foj-foja malplenigo de rubujo en la CO?

Joop Kiefte
Gasto
Kara, aliro al la datumbazo KUN LA PROPRAJ MEMBROJ, aliro al la konto KUN LA PROPRA MONO. Ne temas ĉi tie pri peto de servoj, sed pri minimuma kapablo fari la proprajn aferojn. Eŭropaj organizoj ĝeniĝas ĉar simpla pago daŭras monatojn. Tio grave endanĝerigas la reputacion de TEJO, dum de UEA-flanko oni supozas ke estas simple infaneca ĝeno. Tio ne vere profesie helpas Esperantion. La sendependiĝo estas simple necesa bazo por la eŭropaj projektoj, per kiuj TEJO kolektas multe pli da mono ol UEA iam ajn povus doni. TEJO estas pli memstara kaj fleksebla ol UEA, sed estas artefarite limigata… Legi pli »
Konsilanto
Gasto

Se UEA estas tiom fuŝa, la sendependa TEJO kreu propran datumbazon kaj mem librotenu siajn spezojn. Ĝi estas sendependa kaj principe ĝi mem respondecas pri tio. Kial ŝovi la taskon al iu eta UEA, kiu havas malpli da stabanoj ol TEJO?

Joop Kiefte
Gasto

pri tio ĝuste nun okupiĝas la prezidento k aliaj. tial ni bezonas havi aliron al la nunaj membroj. ni jam mem librotenas, nur temas pri propra bankokonto. por tion povi havi necesis la memstariĝo. mi helpis pri la akiro de propra bankkonto, laboro jam okazas.

Andreas J. PENK
Gasto

Vi ne povis malfermi konton antaŭ via sendependiĝo? Mi pridubas tion.

Joop Kiefte
Gasto
Tio dependas de la landaj leĝoj. Laŭ mia kompreno la afero ĝuste estas tiel pro la detaloj de la Nederlanda leĝo. Mi scias ekzemple ke estas simila situacio pri la memstareco de BEJO en Brazilo: teĥnike ĝi estas parto de BEL kaj ĝi ne havas propran jurpersonecan numeron, kio komplikigas praktikan memstarecon en diversaj situacioj. Tiajn detalojn kutime ne koncernas la ekstera publiko, kaj devas kutime ene solviĝi. Se ĉi tiaj aferoj publikiĝas tiel, estas ja pro urĝa, vera bezono. Se ne estus bezono, ne estus sendependiĝo, ĉar TEJO efektive ĉiam havis la intencon kiel eble plej bone funkcii kiel… Legi pli »
Francisco Javier Moleón
Gasto

> La celo de junula organizo estas ĝuste povi fari proprajn erarojn.

La celon vi plenumis.

Joop Kiefte
Gasto

Mi memoras kiel mi devis petegi al mia patro povi fari miajn proprajn erarojn. La granda problemo de plenkreskeco estas vidi eraron kiel malbona afero.

Bernardo K
Membro
Mi simpatias. Tamen… Se oni volus "fari siajn proprajn erarojn" oni prave povus starigi, labori kaj konstrui sian propran, mondskalan junularan organizaĵon, provi fari tion laŭ la proprajn ideojn, celojn kaj pens/agmanierojn. Se sekvas malsukceso, ne forte gravas, kaj oni almenaŭ lernis per tio. Tamen, se oni ja insiste transprenus plenan, solan respondecon por tia granda — jam ekzistanta, mondskala organizaĵo konstruite de, flegite de, kaj subtenate (ne nur per mono) longatempe (jardekoj) de tre multaj aliaj homoj (ne nur junuloj), kaj ja sufiĉe sukcesa organizaĵo kiu nun ekzistas kiel la ĉefa oficiala servo al amaso da junuloj kiuj pli-malpli… Legi pli »
Andreas J. PENK
Gasto
Mi legis jarojn la pretendon, ke sen-dependiĝo estus bezona, sed neniam mi legis koncernajn pruvaĵojn. Mi jarojn fondis, gvidis kaj subtenis asociojn en Germanujo. La de mi gvidita asocio ofertis kursojn pri leĝaj kaj administraj demandoj koncerne asocioj. Mi kunlaboris kun fakuloj pri asocia leĝo en la Federacia Ministro de Internaj Aferoj, altlernejoj kaj universitatoj. La plej alta forumo de asocio estas la membraro. Estas la devo de ĉiu estraro, sufiĉe bone informi la membraron pri ĉiuj gravaj aferoj kaj leĝaj bazoj. Sed evidente la TEJO-estraro havas alian opinion. Certe, la leĝoj pri asocioj varias de lando al lando. Sed… Legi pli »
Andreas J. PENK
Gasto
Estimata s-ro Joop Kiefte, mi tre bedaŭras vian respondon – sur nivelo de dekjara knabo! La preparado de la sendependiĝo de TEJO fare de la TEJO-estraro estis evidente fuŝaĵo. Fuŝa, kiel la uzado de subvencioj de la Eŭropa Unio fare de la TEJO-estraro, fuŝa, kiel la propra librotenado ktp. Ĉu vi ne preparis kontrakton kun UEA pri la multaj administraj demandoj? Ĉu vi pensis, ke venos ia feino kaj klarigos ĉion? Ne gravas, ĉu ankaŭ membroj de TEJO estas en la datumbazo de UEA. UEA estas la posedanto de tiu datumbazo, ne la nun sendependa TEJO. Ĉu vi demandis la… Legi pli »
Yves Bellefeuille
Gasto
TEJO kaj UEA jes faris kontrakton pri kunlaboro ( http://uea.org/teko/regularoj/regularo_pri_kunlaboro_kun_tejo ), sed la tuto estas tia mikspoto de dependeco kaj de sendependeco ke estis antaŭvideble ke estos problemoj. Jen nur unu simpla ekzemplo. La Estraro de UEA elektas la Ĝeneralan Direktoron (artikolo 33 de la statuto de UEA). Tamen, la Ĝenerala Direktoro rajtas decidi pri iuj pagoj "el la monrimedoj de TEJO", kaj se la pago estas aparte granda, tiam la Ĝenerala Direktoro devas aprobi ĝin (ĉapitro 3, artikolo 3 de la Regularo pri kunlaboro inter UEA kaj TEJO). Nu, se TEJO estas sendependa, kial la Ĝenerala Direktoro de alia… Legi pli »
Joop Kiefte
Gasto

Unue nur estis unu ĝenerala direktoro. En la novaj dokumentoj estas skribite pri ĝenerala direktoro de TEJO, kiu ĝis nun ankoraŭ estas la sama persono de Veronika Poor. Do teĥnike ŝi ne estas la ĝenerala direktoro de alia organizo, sed klare montriĝas problemoj pro duestreco…

Yves Bellefeuille
Gasto
La Regularo pri Kunlaboro specife diras: "La Centra Oficejo en ĉi tiu regularo estas la Oficejo de UEA". Kaj ĝi diras: "La Centra Oficejo pagas sumon el la monrimedoj de TEJO". Kaj poste ĝi parolas pri la rajtoj de la Ĝenerala Direktoro rilate al pagoj. Kaj ĝi ankaŭ diras ke TEJO ricevas "la konsilojn kaj kunlaboron de la Ĝenerala Direktoro kaj de aliaj oficistoj de UEA". Se la intenco estis, ke la Centra Oficejo estu tiu de UEA, kaj ke la Ĝenerala Direktoro kaj aliaj oficistoj kiuj donas konsilojn estu tiuj de UEA, sed ke la Ĝenerala Direktoro kiu havas… Legi pli »
Sebastiano
Membro

Joop: "ĝenerala direktoro de TEJO … Veronika Poor. Do teĥnike ŝi ne estas la ĝenerala direktoro de alia organizo":

Se estus tiel, kiel vi asertas, tiam la TEJO-estraro povus maldungi Veronika Poor kaj decidi pri ŝiaj laborkondiĉoj kaj salajro. Ĉu la TEJO-estraro ne povas fari tion? Tiam teĥnike ŝi ne estas ĝenerala direktoro de TEJO.

Joop Kiefte
Gasto
Plej estimata moŝto PENK, kun intereso ricevis vian komenton alskribita Joop Kiefte. La unua punkto, pri dekjareco, kvankam tuj malpruvebla, estos en respekto de via moŝto diligente konsiderata. La dua punkto pri fuŝa sendependiĝo sen plano, estas interesa vidpunkto. Pretervidante la laboron kiun mi mem metis en tio, mi iel povas imagi vian pravecon en tio. Sed ni lasu tion prijuĝi ĝis la punkto tri, la aliro de la propraj datumoj. Vi ĉi tie asertas diversajn malpravaĵojn. Unue, se TEJO ne havas aliron al la datumoj de siaj membroj, TEJO ne estas ĝuste dirite memstara kaj ne stirebla de supera… Legi pli »
Sola Malsamideano
Gasto

Do.. Kial oni lernu Esperanton?

Marc Bavant
Gasto

Aĥ, kia kaĉo. Ĉu vere necesas publike kirli la merdon?

wpDiskuz