Esperanto iĝis la dua lingvo en Ouya
La malgranda kaj malmultekosta ludkonzolo Ouya estas bazita sur la libera operacia sistemo Android, kaj ĝia evoluigo estis financita de entuziasmuloj, kiuj donacis 8,5 milionojn da usonaj dolaroj pere de la retejo Kickstarter.
Ĉiuj ludoj por la nova aparato estos baze senpagaj almenaŭ por provi ilin, sed oni povas aĉeti kromaĵojn ene de la ludoj. La aparato mem estas relative malmultekosta – depende de la lando, la prezoj varias de 99 usonaj dolaroj al 99 eŭroj kaj 99 britaj funtoj.
La aparato estis lanĉita la 25-an de junio. Ĝia interfaco komence estas nur angla, kaj same anglalingvaj estis ĉiuj ludoj kaj programoj haveblaj je la lanĉo. Post unu monato aperis la unua neanglalingva ero: Muzaiko, programo por aŭskulti la tuttempan Esperantlingvan retradion tiunoman, kaj kelkajn aliajn Esperantlingvajn elsendojn.
– Mi memoris, ke Jacob Nordfalk verkis programon por aŭskulti Esperanto-radion per Androjdaj telefonoj kaj pensis, ke estus facile porti ĝin al Ouya. Estis fakte pli da laboro ol mi pensis, sed mi kontentas pri la rezulto! Ĉar la kodo mem estas malfermfonta, estis tre facile kunlabori per Google Code, rakontas Chuck Smith, kiu entreprenis la taskon kune kun Jacob Nordfalk.
Krom por aŭskulti Esperanto-radion en televidilo, la aparato ĉefe utilas por televidludoj. Eblas ankaŭ instali en ĝi aliajn Android-programojn, sed ne certas, ke ĉiuj programoj kreitaj por tuŝekrano estos facile uzeblaj per lud-regilo.
La nunaj niĉoj kreitaj de Smith kaj Nordfalk estas tre atentindaj. Ne estas la unua fojo ke ili kreas novajn projektojn kiuj vere povas atingi la alian flankon de la abismon inter idealistoj kaj la profitcelumanta plimulto. Ni priatentu ĉiajn projektojn kiuj kapablas enmeti Esperanton en la praktikan utiligadon, aŭ en la favoran asociiĝon, de la nunaj neesperantistoj. La ŝlosilo por sukcesa transiro al la plimulto NE estas celumi ĉiujn, sed provi krei ion utilan por tre malgrandaj subcelgrupoj.
Amike,
Dennis Keefe
Universitato de Nankino, Ĉinio