Donacantoj savis instruistan retpaĝaron

Libera Folio: Kial edukado.net estas grava?

Katalin Kováts: Edukado.net la unuan fojon estis lanĉita antaŭ 9 jaroj, kaj la nuna lanĉita retejo estas jam la tria versio. La paĝaro havas 2.200 membrojn el 106 landoj, ĉefe instruantojn de la lingvo.

La anoj de la komunumo pere de la retejo povas ricevi konkretajn helpojn por sia laboro, informojn pri lerniloj, ili povas laŭ temoj, niveloj, lingvoj ktp serĉi inter la pli ol 600 uzpretaj ekzercoj, povas pluperfektiĝi legante fakajn artikolojn. En la retejo funkcias koresponda servo, listo (kaj nun ankaŭ mondmapo) de movadaj kaj lernejaj kursoj, kaj facile troveblas sur mapo Esperanto-instruistoj. En la forumo de la paĝaro eblos pridiskuti diversajn metodikajn kaj lingvajn problemojn.

La forto de la retejo estas, ke kvankam ĝi estas sub la gvidado de unu persono, la materialojn kunmetis cento da kontribuantoj, kolegoj kaj instruantoj, kiuj dividas siajn laboraĵojn kaj spertojn kun la aliaj. Edukado.net fariĝis vera metiejo de instruantoj de Esperanto. En normala situacio, kiam temas pri naciaj lingvoj, ties instruistoj trejniĝas en lernejoj, kolektiĝas en fakaj asocioj kaj havas regulan pluperfektigadon, subtenan helpon. Tion celas anstataŭi la retejo de edukado.net, kie ekde la jarfino funkcios ankaŭ reta trejnkurso pri metodiko kaj instruado.

Pri kiuj novaĵoj en la paĝaro vi plej fieras?

Biblioteko: laŭvica bilda prezento de la 500 analizitaj lerniloj, libroj. Panteono: tie ni starigas memorpaĝon al famaj kaj meritplenaj instruantoj kaj disvastigintoj de nia lingvo. Momente ĝi enhavas nur forpasintajn samideanojn, sed ni planas grandigi la kolekton ankaŭ per informoj pri vivantaj elstaraj pedagogoj. Proponoj, kontribuaĵoj estas bonvenaj.
Mondmapo kaj listo de Esperanto-kursoj kaj -instruistoj, kiun se ni kune plenigas per aktualaj datumoj povos esti impresa travidiga statistiko pri la disvastigiteco de Esperanto. Diplomlaboraĵoj: ĵus estis lanĉita la sekcio kie ni kolektas diplomlaboraĵojn, verkitajn en Esperanto aŭ pri esperantologia temo. Eblos facila serĉo, alŝuto de specimenoj, eĉ de tuta verko, sed almenaŭ listigo de la jamaj studoj.

La paĝaro ankoraŭ ne estas tutpreta, mankas kelkaj sekcioj kaj funkcioj, kaj necesas mane transporti ankoraŭ kelkcent dokumentojn, sed la lanĉo bone sukcesis, la ĝisnunaj vizitantoj estas kontentaj kaj feliĉaj.

Kial la rearanĝo estis tiel granda kaj kosta projekto?

La dua versio de la paĝaro, kiun konstruis nederlanda entrepreno kaj kiu funkciis ekde 2005, fariĝis tro eksmoda kaj senpage tute ne plivastigebla, ne rearanĝebla. Komencis aperi pli kaj pli da problemoj, partoj misfunkciis, malaperis. La riparado kaj samreteja modernigo ĉe la entrepreno kostintus dekmilon da eŭroj, kaj la sistemo daŭre restintus baze malnova. Aldone ni komprenis, ke kvankam la retejo konstruiĝis laŭ miaj planoj kaj mendoj, nek la programo nek la enhavo apartenis al ni, sed male, estis la posedaĵo de la entrepreno. Sekve ĝi estis kaj estus neniam transprenebla por esperantistoj kaj ĉiam pagenda kaj iam ajn perdebla. Estis plej saĝe laŭeble rapide forlasi la sinkantan ŝipon. Al tiu decido kontribuis ankaŭ la fakto, ke la ĝistiama financinto de la retejo, la fondaĵo ESF (Esperantic Studies Foundation), ne plu povis investi monon por la renovigo, ĝi povis garantii nur la vivtenon kaj funkciigon de la paĝaro, kion ĝi daŭre eĉ nun faras.

Post konkursigo de pluraj entreprenoj ni elektis la entreprenon GAUS, pro tri ĉefaj kialoj. Unue: ĝi estas esperantista, kaj tiel la retejo estas en manoj de lingve kompetentaj homoj, kiuj eĉ komprenas kion ili faras. Tio ne estis la kazo kun la nederlanda entrepreno. Due: ilia prezpropono estis la plej favora. Trie, la jamaj projektoj, faritaj de Jevgenij Gaus, estis konvinkaj kaj donis garantion pri bonkvalita laboro. Min mem influis ankaŭ alia faktoro, iom neoficiala, nome ke mi ŝatas labori kun junuloj, kiuj kapablas sekvi mian ne ĉiam "normalan" labor- kaj vivritmon.

Revene al la financoj aldonendas, ke la difinita buĝeto ne vere kovras la verajn kostojn. Ni ne kalkulis je la malvolonta kunlaboro de la nederlanda entrepreno, kiu ne ebligis al ni aliron al la datumbazo, liveris nur parton de la enhavo, kaj tial ni devis longe deĉifri mankohavajn kodojn kaj mane transporti la plejmulton de la datumoj. Tial la laboro daŭris pli longe ol ĝi estis planita. Sen la persisto, maksimuma subteno kaj multe da volontula laboro de Jevgenij ni ne havus la nunan rezulton: la plej modernan kaj riĉan Esperanto-retejon.

Kiel oni sukcesis trovi la monon?

La plej granda parto de la mono kolektiĝis ene de tri monatoj, post la unua helpokrio, lanĉita en majo 2009. Tiam danke al deko da grandaj sponsoroj (kiuj donacis po inter 500 kaj 3.000 eŭrojn) kontribuis ankaŭ 215 individuoj per sumoj de unu ĝis 499 eŭroj. Ili estas membroj de la retejo kaj dum jaroj profitis el ĝi, sekve ili konsciis pri la valoro kaj utilo, kaj la katastrofa situacio okaze de la perdo.

Por la originalaj planoj mankas ankoraŭ proksimume 3.000 eŭroj, kaj por realigi dumlabore naskiĝintajn pliajn brilajn ideojn, bonvenus pliaj sumoj. Ni esperas, ke la videbla rezulto konvinkos ankoraŭ kelkajn uzantojn kontribui al la projekto kaj tio helpos fini ĝin brile.  Por ĉion laŭleĝe aranĝi ni kreis Fondaĵon Edukado.net , kiu jure reprezentas la paĝaron kaj donas certecon pri ties plua funkciado kaj subteno de edukcelaj projektoj.