Novjara Renkontiĝo kolektis infanojn kaj malinfanojn
En la vespera programo Christoph Frank brile prezentis persone kaj per pupoj teatraĵon pri la aventuroj de Münchhausen, la inventinto de bele fantaziaj rakontoj. Estis luda, muzika kaj internacia vesperoj kaj kompreneble silvestra festo, dum kiu eblis spekti la piroteknikaĵojn de Frankfurto el taŭge lokita salono en la 5-a etaĝo.
La infana programo kadre de la temo "la kvar elementoj" enhavis kreadon de kajtoj, raketveturiloj, paraŝutoj, fajropilkoj, kandelaj kaj terornamaĵoj; la junuloj lernis kiel solvi la magian Rubik-kubon kaj spertis surprizan akvoarton kaj eksperimentojn pri akvo, aero kaj fajro; estis infana danckurso, kaj oni povis lerni akrobatikon.
Oni aŭdis "piĵamajn rakontojn" kaj rimaĵojn, kantis komune, ŝminkis unu la alian kaj kreis improvizan muzikan teatraĵon. Grupo de junuloj kreis filmojn pri la aranĝo kaj ofertis daŭran diskotekon al dancemuloj. Okazis luda posttagmezo, dum kiu oni en la unuopaj stacioj solvis diversajn taskojn. Fakte estis plena programo por infanoj kaj junuloj de mateno ĝis vespero, kaj malfacilis enui.
La prelegoj temis pri la financa krizo kaj pri gestolingvo, pri Su-Dghok-terapio, Marso, la kvar elementoj en la kosmo, vikipedio, EDE, Esperanto en entreprenoj, Argentino kaj pri Herzberg; estis diskutoj pri "Kio estas esperantisto", pri perspektivoj por Esperanto kaj pri la Civito. La partoprenantoj povis senstreĉiĝi per gimnastiko, vizaĝmasaĝo aŭ per Yumeiho, aŭ ili povis lerni kiel trike (kaj truke) krei bestetojn aŭ hokile triki.
Ankaŭ ĉi-foje estis kursoj por komencantoj, progresantoj kaj konversaciemuloj, kiujn gvidis Katalin Kováts, Sylvain Lelarge kaj Gunter Neue. La ekskursoj kaj promenoj gvidis nin tra Frankfurto, al muzeo pri "Hirthara Petro" kaj al Darmstadt. Malgraŭ ĉiuj unuopaj ofertoj, supozeble ankaŭ ĉi-jare plej gravis la amika babilado, kiu okazis grandparte en nia trinkejo, kiun sperte gvidis Helmut Klünder. La infanoj dume havis sian propran regnon en alia parto de la domo.
La gazetaraj komunikoj atentigis pri la tri samtempaj Esperanto-aranĝoj en Germanio kaj ties impona kresko dum la pasintaj jardekoj; rezulte raportis germana kaj hispana novaĵagentejoj, tri radioprogramoj kaj almenaŭ deko da gazetoj kaj retgazetoj el Germanio, Hispanio, Usono, Meksiko kaj Argentino.
Lu Wunsch-Rolshoven
EsperantoLand.org
Mi estas ĉina komercisto internacia per Eo. Mi volas scii, kia rezulto estis sub temo "Esperanto en entreprenoj"? Tio estas interesa al mi. Alie, kiel estrano de IKEF mi invitas E-komercistojn kaj entreprenistojn aliĝi al nova diskutgrupo de IKEF < komerco@googlegroups.com > aŭ <Retpaĝo: http://groups.google.com/group/komerco?hl=eo > La faka agado povas helpi nian vivon kaj movadon!