La kongreso duobligis la hotelprezojn en Bjalistoko
La diskuto pri la kosto de tranoktado en Bjalistoko komenciĝis post la apero de la Dua Bulteno, kie estis publikigitaj la prezoj de UEA por hotelaj rezervoj. La kanada komitatano Yves Bellefeuille tiam atentigis, ke la prezoj de UEA multloke estas duoble pli altaj, ol la prezoj anoncataj en la retejoj de la koncernaj hoteloj.
- Kaj UEA ŝajne rezervis ĉiujn ĉambrojn en la urbo, tiel ke la hoteloj rifuzas rektajn mendojn. Oni devas akcepti la troigitajn prezojn de UEA. Mi akceptas ke UEA faru profiton pro la hotel-mendoj, sed tio ĉi estas nuda rabado, li skribis en la komitata diskutejo.
Kiam la Universala Kongreso okazas en granda urbo, la kongresanoj havas la elekton rezervi hotelĉambron tra UEA aŭ fari tion memstare. En la interreta epoko iĝis multe pli facile por la kongresanoj kompari la prezojn kaj elekti la plej favoran alternativon.
Tio tamen ne validas en Bjalistoko, kie la kvanto de haveblaj tranoktejoj proksimume egalas al la kvanto de la kongresanoj, tiel ke post la rezervoj faritaj de UEA jam ne restas alternativaj tranoktejoj. Tia situacio evidente donas al la peranto liberajn manojn altigi la prezon.
La ĝenerala direktoro de UEA, Osmo Buller, atentigis, ke la prezdiferenco estas uzata por financi la kongreson.
- Komitatanoj bonvolu konscii, ke la "profito" pro loĝigo kaj ekskursoj ne iras en la kason de UEA sed en la kason de la koncerna UK. Tial mi skribas la vorton "profito" inter citiloj. Sen tiu ekstra enspezo la kongresaj kotizoj devus esti pli altaj. Sekve ĉiu, kiu mendas servojn pere de UEA, kontribuas al la komuna bono de ĉiuj kongresanoj, ankaŭ de tiuj, kiuj ne partoprenas en la komuna respondeco.
Tiu respondo tamen ne tute kontentigis ĉiujn komitatanojn. Halina Komar el Pollando plendis, ke la altaj prezoj de loĝado malebligas la partoprenon por maljunaj kaj malriĉaj kongresanoj el postsocialismaj landoj.
Ŝi krome eksuspektis, ke la profito tute ne iras al la kongresa kaso, sed al turisma agentejo, kun kiu UEA subskribis kontrakton.
- Antaŭ momento mi ricevis informon, ke la prezoj en studentaj domoj en Bjalistoko kostas 26 zlotojn po persono nokte, kaj tiuj ĉi lokoj estas la plej multaj en Bjalistoko. Sed - imagu - la tuton rezervis tiu mistera agentejo, kaj la postulita prezo egalas 400 procentojn de tiu ĉi prezo, do 20 eurojn!
Por klarigi la situacion kaj montri, kien efektive iras la mono, Yves Bellefeuille petis, ke la Centra Oficejo montru al la komitatanoj la koncernan kontrakton. Laŭ respondo de Osmo Buller tio ne eblas, ĉar la kontrakto estas konfidenca "same kiel via UEA-konto".
Tiu klarigo ne sufiĉis por komitatano Brian Moon el Luksemburgio:
- Estas sufiĉe evidente, ke pri la prezoj ne kulpas sole (aŭ eĉ ne ĉefe) UEA, ĉar oni kontraktis kun agentejo pri la loĝservo. Sed tial la respondo de Osmo, ke "la kontraktoj estas same konfidencaj kiel via UEA-konto" estas almenaŭ nekontentiga, kaj fakte neakceptebla: la kontraktoj rajtas esti iagrade konfidencaj, sed certe ne "same" kiel ies UEA-konto, ĉar la konto interesas ĉefe la kontohavanton, dum la kontraktoj interesas ĉiujn UK-aliĝintojn kaj eĉ ĉiujn UEA-anojn. Estas verdire tie ĉi grandaj problemoj pri travidebleco kaj kredindeco en la mastrumado de UK, kiujn la Ĝenerala Direktoro ne rajtas forbalai per kelkaj vortoj.
Osmo Buller ne konsentis respondi al demandoj de Libera Folio pri la temo.
Eksciinte pri la UK (kaj ĵus partopreninte mian unuan kongreson - IJK 2008) mi tuj konsideris memkompreneble ke mi ĉeestos la venontan UKn.
Tamen mi intertempe seniluziiĝis kiam samklubano anoncis al ni la prezon de la Meka restado, kiel difinita de nia Eklezio UEA.
Unue mi pensis ke tio ne malhelpu, mi provos ŝpari centon da eŭroj pli.
Tiam la klubano klarigis: tiun prezon ne konsistigas manĝoj kaj noktoj.
Mi komprenas ke esperantistoj strebas al seriozeco de l'aspekto movada, sekve kongresa.
Sed ĉu nepre oni estigu klasbatalon ene de nia lando?
Mi tre ŝatus kongresi la tutan someron, sed ne certas ĉu mi povos aliĝi eĉ unu, kaj tiu certe ne estos UK.
Mi profitas la aperon de tia artikolo por instigi ĉiujn pripensi kaj pligrandigi la loĝproponojn.
Tendumado, eĉ se malplikomfortas, venigos certe multajn homojn. Tute eblas prelegi en arbaro, tute eblas kuiri sur lignofajro.
Kaj certe kelkaj diros ke eblas eĉ lasi al ĉiu partoprenato decidi mem kiom ŝli pagos por la loko, la manĝo, la programo.
Ne maltrankviliĝu gesinjoroj, mi neniel timigos vin per aludo je nigra revoluciema armeo (kvankam mi tre ŝatus...) sed nur promesas mojosajn, kreigajn kaj buntajn kongresojn.
Se UEA fariĝos diktaturo en kongresurboj, ŝajnas al mi ke venis tempo por la esperantoparolantoj senigi sin je asocioj (multaj jam faris), Esperantoj ja ne bezonas ŝtaton.