Nur post la morto de la konata kaj ne ĉie ŝatata aŭstria politikisto iĝis vaste konata, ke li havis ne nur edzinon kaj du filinojn, sed ankaŭ viran koramikon. La novaĵo ricevis relative grandan publikecon en la mondo, ĉar multaj konsideris la politikon de la partio de Haider nefavora al gejoj.

La temon mallonge tuŝis ankaŭ la tria ĉi-jara numero de Forumo, kiu atingis la abonantojn en Eŭropo en la unuaj tagoj de novembro:

La ĵus pasintan 11-an de oktobro mortis en aŭtomobila akcidento Jörg Haider, regist[ar]estro de Karintio (Aŭstria landero) kaj gvidanto de la ekstremisma dekstrula partio BZOE.

Li veturis tro rapide, mem kondukante la aŭtomobilon ebria, post la 1-a nokte. Laŭ la noticoj, oni vidis lin, pli frue, en la geja trinkejo Zum Stadtkrämer, kune kun junulo, kaj [li] drinkis tre multe.

Ne estas novaĵo, ke la politikisto – edziĝinta kaj jam kun du filinoj – frekventis gejejojn kaj estis plurfoje tie fotita kune kun junaj viroj, tamen la polikistaro ĉiam prisilentis la aferon kaj provis preteratenti la “skandalon”. La politikaj ideoj de lia partio, de Haider mem ripetataj, estas klare homofobiaj.

La trialinea teksto tuj elvokis fortan proteston en la publika diskutlisto de LSG flanke de unu el la membroj, la aŭstria kantisto Attila Schimmer, kiun esperantistoj konas interalie pro lia lastatempa prezentado en la Internacia Esperanto-Muzeo de Vieno dum ties malferma nokto:

- Hodiaŭ mi ricevis la lastan numeron de Forumo kaj kun bedaŭro mi legis la artikolon pri nia amata bedaŭrinde mortinta Jörg Haider. Vi konstatis ĉi tie ke lia partio BZÖ estus "ekstreisma dekstrula" kaj ke la ideoj de lia partio estus "klare homofobiaj". Kontaŭ tiu mensogo mi protestas. Min tute ne interesas kion diversaj tielnomataj maldekstraj enlandaj kaj eksterlandaj medioj skribaĉas disvastigante mensogojn. Mi ankaŭ ne deziras komenti la artikolon kaj diskuti pri tio. Mi ne plu volas esti membro de LSG kaj ne plu deziras ricevi leterojn.

En sia blogo ĉe Ipernity Attila Schimmer klarigas, ke li konis persone kaj Jörg Haider kaj lian fratinon, kaj ke li multe laboris por la partio BZÖ okaze de kulturaj eventoj. Li ankaŭ nomas "porkino" hungaran ĵurnaliston, kiu kritike raportis pri Jörg Haider.

La sekretario de LSG, Rolf Köhler, decidis respondi la kritikojn de Attila Schimmer en ties blogo. Li atentigas, ke Jörg Haider interalie estis bona amiko de Saddam Hussein, publike laŭdis partojn de la politiko de Hitler, postulis koncentrejojn por "krimaj eksterlandanoj" kaj subpremis la rajtojn de la slovena minoritato en Aŭstrio.

- Kelkaj homoj en inter[r]et-forumoj vidas Haider en unu vico kun la gejaj naciistoj Ernst Röhm kaj Michael Kühnen, kiuj same ne atingis altan aĝon. Haider certe ne estis faŝisto, sed li ludis kun tiaj pensoj kaj alparolis la plej malaltaj[n] instinktoj[n] de la homoj. Por [l]ia familio lia morto eble estis perdo, por la socio ne, skribis Rolf Köhler.

Li samtempe atentigis, ke Attila Schimmer estas bonvena resti en la asocio kaj daŭrigi la debaton:

- Kara Attila, LSG havas lokon por tre diversaj homoj kun tre diversaj opinioj. Kompreneble vi rajtas forlasi la gejan Esperanto-movadon, se vi volas tion. Mi preferus interŝanĝi argumentojn kaj faktojn anstataŭ malveraj a[s]ertoj.

Attila Schimmer en sia blogo respondis al la argumentoj, interalie dirante, ke la reĝimo de Saddam Hussein estis pli amika al gejoj ol la nuna registaro en Irako:

- Via aserto ke li vizitis Saddam Hussein plurfoje, estas malvero: li vizitis Saddam Hussein nur unufoje, kaj li ne estis amiko de Saddam Hussein. Li mem diris ke Saddam Hussein estas diktatoro. Nun detale skribi pri tio kial li vizitis tiam Saddam Hussein estus tro longe. Tamen ĉu vi pensas, ke la nuna reĝimo en Irako estas pli demokratia? Saddam Hussein ne permesis ke diversaj religioj subpremu unu la alian kaj ĉiuj ricevis (ankaŭ kristanoj) ŝtatan subvencion. Ankaŭ gejoj ne estis persekutitaj tiam. Nun en la tielnomata demokratio jes.