Aperis la plej granda dulingva vortaro de Esperantujo
Erich-Dieter Krause estas emerita profesoro pri la indonezia lingvo ĉe la universitato de Lepsiko (Leipzig) en Germanio kaj vortaristo kaj leksikografo pri la indonezia kaj Esperanto. Li estas membro de la Akademio de Esperanto.
La nova verkego estas fortike bindita, pli granda kaj preskaŭ duoble pli dika ol Plena Ilustrita Vortaro. Ĝi enhavas 160 000 kapvortojn, kaj pro tio estas plej granda dulingva vortaro de Esperanto.
La nova vortaro estas la rezulto de 40-jara leksikologia kolektado kaj esplorado de plej variaj Esperanto-tekstoj el ĉiuj partoj de la mondo. La klara aranĝo de la kapvortaj artikoloj, la aldono de vasta gamo da indikoj pri faklingva uzo kaj aldonaj vortklarigoj faras la vortaron facile uzebla por kiu ajn, skribas Flandra Esperanto-Ligo en sia komuniko.
