Dekoj da esperantlingvaj dissendolistoj kredeble estis forviŝitaj de Yahoo, ĉar la administrantoj eksuspektis ke la retpoŝta adreso de Renato Corsetti dissendas rubomesaĝojn tra la listoj. Ni demandis al Renato Corsetti, ĉu li scias ion pri la okazintaĵo.

- Mi scias, ke mia ret-adreso ĉe la servilo virgilio.it de ĉi-matene resultas ĉe Yahoo kiel "haltigita" (disabled). Mi provis skribi por peti la kialojn, sed evidente ne venis respondo. Aliflanke ĉiam ŝajnas fukcii por Yahoo la aliaj adresoj. Mi ne komprenas.  Mi scias ke la servilo virgilio.it estis konsiderata fonto de spamaĵoj jam de pluraj serviloj ekstelandaj.

La retejo Yahoo estas la plej granda senpaga servilo por retpoŝtaj listoj en la mondo, kaj aktivas en multegaj landoj. La servoj de Yahoo estas ĉefe financataj per reklamo, kaj oni foje kritikis la entreprenon pro malatento al plendoj de uzantoj kaj disvastigo de reklam-programoj, kiuj instaliĝas en la komputilo de Yahoo-uzantoj sen ilia scio.

La plej seriozan kritikon Yahoo ricevis post kiam la ĉina ĵurnalisto Shi Tao estis kondamnita al dekjara malliberigo. Shi Tao publikigis en la reto registaran ordonon cenzuri tekstojn pri la okazaĵoj sur la placo Tiananmen. La kondamno iĝis ebla, post kiam Yahoo en 2005 transdonis al la ĉina registaro la tutan retpoŝtan arkivon de Shi Tao.

Post tio la sindikato de britaj kaj irlandaj ĵurnalistoj admonis siajn 40.000 membrojn bojkoti ĉiujn servojn de Yahoo.

Ĉi-foje tamen eble temas pri teknika fuŝo, suspektas Steven Brewer, unu el la teknikaj respondeculoj de Esperanto-Ligo por Norda Ameriko (ELNA). Ajnakaze, ne ekzistas multaj alternativoj al Yahoo, li aldonas.

- Antaŭ jaro (kiam ni renovigis la ELNA-retejon), ni iom esploris ĉu memstare provizi tiajn servojn, sed decidis ke Yahoo ja faras la aferon pli bone ol ni povus facile fari. Mi regas similajn servojn profesie kaj administri retpoŝtajn listojn ne estas facila afero. Estas diversaj difketoj pri la Yahoo-servado - laŭ mi, plejparte pri tio ke oni ne povas uzi esperantlingvan interfacon nek indiki ke la mesaĝoj estas en Esperanto -- sed la kosto ($0) ĝustas kaj dum jaroj estas ege stabila. Ni vidu, sed mi kredas ke baldaŭ la listoj reaperos kaj ni decidos ke "monto gravediĝis kaj muso naskiĝis".

Simile esperas Andrej Grigorjevskij, unu el la retaj respondeculoj de UEA.

- Plej unue mi supozus "homan faktoron" kaj demandus de la posedantoj de la grupoj, ĉu ili havas ian rilaton al tio. Sed se malaperis ankaŭ listoj ne posedataj de Renato Corsetti (kaj pere de li iuj komisiitoj), tiu konjekto  ne validas. La alternativo por retlistoj momente estas nur Google-grupoj. Abonu.com ne permesas diskutajn listojn (la programaro principe permesas, sed tio ne estas realigita en la esperanta versio).