Forpasis Wouter Pilger
Laŭ sia propra hejmpaĝo Wouter Pilger estis "Nederlandano (=civitano de Nederlando!), kun pragepatroj plejparte Nederlandaj, sed ankaŭ Germanaj kaj Francaj". Li studis sociologion en la universitato de Amsterdamo, poste instruis Esperanton, la anglan lingvon kaj nederlandan kulturon en la Internacia Altlernejo en Elsinoro (Helsingör), Danlando. Li laboris kiel redaktoro en eldonejo de lernolibroj, ĝis sia antaŭtempa pensiiĝo.
En la Esperanto-movado li estis unue estrarano de Tutmonda Esperantista Junulara Organizo kaj poste komitatano de Universala Esperanto-Asocio. Li verkis poemojn kaj rakontojn en Esperanto kaj tradukis poemojn, kantojn kaj infanlibrojn. Li ankaŭ kompilis listojn de nomoj de bestoj kaj plantoj kaj faris versiojn esperantan-nederlandan kaj nuresperantan de baza vortlisto de 2.500 radikoj.
Li publikigis artikolojn pri la hejma uzo de Esperanto kaj mem parolis Esperanton hejme kun sia poldevena edzino kaj kun la infanoj.
La lastan skribaĵon en sia interesa blogo Wouter Pilger publikigis malpli ol monaton antaŭ sia forpaso.
Mi konis wouter persone, kaj trovas la novajhon tre shoka.
Unu poemo lia estis premiita en la Belartaj Konkursoj en 1967 kaj estis la unua poemo en Esperanto, kiun mi iam legis. Ghi aperis en revunumero meze de 1967, vershajne en la junia.
Ni renkontighis plurfoje; mi foje korespondis kun li, kaj multon lernis de lia precizemo, agemo, kaj kapablo ghoji. Mi volus chi- momente apudstari apud lia chea amikaro.
Kunfunebre
Probal