Ni petis, ke Flávio Rebello klarigu, kial ne plu videblas la programoj de Internacia Televido. Laŭ li temas pri teknika ĝisdatigo, kiu nun estas farata ĉe la serviloj.

- La brazila servilo, kiu dissendas la elsendfluon de ITV al la tuta mondo, petis de ni kelkajn tagojn por plibonigi siajn komputilojn kaj sistemon. Ni do, kiel klientoj de ili, atendas la finon de la ĝisdatigo ĉe ili por rekomenci normale la elsendojn de ITV, diras Flávio Rebello.

Libera Folio: Kiam estis interrompitaj la elsendoj, kaj kiam ili revenos?

- Ekde la mezo de la pasinta monato, la dissenda sistemo de la firmao, kiun ni dungis por zorgi pri la elsendfluo de ITV, prezentis netolereblan malstabilecon. Ni plendegis ĉe ili, kaj post nia (kaj de aliaj el iliaj klientoj, laŭ mia scio) minaco fortranĉi nian kontrakton kun ili, la firmao decidis renovigi sian aparataron. La renovigo de la sistemo komenciĝis la 26-a de oktobro, kaj daŭros pli malpli ĝis la 8-a de novembro, laŭ informoj, kiujn disponigis ili al ni.

Flávio Rebello esperas, ke la elsendoj de ITV denove funkcios normale ekde la 8-a aŭ 9-a de novembro. Neniu informo pri la teknikaj problemoj aperas en la retejo de ITV mem.