dezirpensado de la E-Civito
Tutmonda ĵurnalista kongreso
Agoj pri dokumento
Kurte
Supren unu nivelonĈi tie aperas mallongaj aktualaĵoj. Pli detalaj versioj povas poste aperi en aliaj sekcioj.
Kajto ricevis prestiĝan premion
La estraro de la Germana FAME-Fondaĵo ĉi-jare aljuĝis sian 9-an kulturpremion al la konata muziukgrupo Kajto. Tiel la unuan fojon muzikartistoj ricevas la premion kiu valoras 5.000 eŭrojn.
Mandrak plu prezidos PEA
En Lodzo la 27-an kaj 28-an de marto okazis la landa Kunveno de Delegitoj de Pola Esperanto-Asocio. Al Lodzo alvenis 22 delegitoj de PEA. Krom delegitoj partoprenis ankaŭ 28 gastoj. Delegitoj krom la pritakso de la pasinta 3-jara funkciado de PEA kaj ĝia estraro proponis novajn taskojn kiujn la novelektita Ĉefa Estraro devus solvi en sia laboro. Polan Esperanto-Asocion daŭre prezidos Stanislaw Mandrak.
Lasta prepar-seminario por la IJK
La lasta preparseminario por la jubilea IJK (10-17 jul 2004) finiĝis la 3an de majo en la estonta IJKejo en Kovrov, Rusio. La partoprenantoj kontrolis la staton de ĉiuj ejoj kaj finkompilis la programon. La sekva vizito de organizantoj al la ripozejo 'Berjozka' okazos nur 1 semajnon antaŭ la IJK-60, kiam oni kontrolos realigon de ĉiuj interkonsentoj inter la LKK kaj estraro de 'Berjozka'.
IJK 2005 okazos en Pollando
En sia lasta ret-estrarkunsido la TEJO-estraro decidis akcepti la proponon de la polaj junaj esperantistoj inviti la IJK-on al Pollando en 2005.
Verkistoj renkontiĝis ĉe Spomenka Štimec
En la bieno de Spomenka Štimec en nordkroatia vilaĝo la 16-an de julio okazis renkontiĝo de esperantistaj verkistoj. Ĉefgastoj estis verkistoj Vinko Oŝlak, Gerrit Berveling, Eugeno de Zilah kaj Spomenka Štimec. La verkistoj parolis pri sia laboro kaj legis iom el siaj verkoj.
Sveda estraro juniĝis
Sveda Esperanto-Federacio, kiu kongresis fine de majo en la Esperanto-domo en Lesjöfors, draste malaltigis la mezuman aĝon de sia estraro. Estis novelektitaj kiel estararanoj tri junaj homoj kun ĵusa aŭ daŭra aktiveco en la junulara movado. La novaj estaranoj estas Sjoerd Bosga, antaŭa prezidanto de TEJO, Katja Ignatjeva, daŭre en la TEJO-estraro, kaj Fredrik Olofsson, pli frue estrarano de SEJU, organizo de la junaj svedaj esperantistoj. Franko Luin estis reelektita kiel prezidanto.(NUN)
Svedaj esperantistoj kontaktos EU-parlamentanojn
Sveda Esperanto-Federacio decidis starigi laborgrupon por daŭra informado al la svedaj EU-parlamentanoj. En sia ĵusa kunsido la estraro de SEF ankaŭ decidis modernigi la retpaĝojn ĉe www.esperanto.se, kaj esplori, ĉu oni fermu la Esperanto-Centron en Stokholmo por ŝpari monon.
Libro pri infana balotrajto aperos esperante
La 28an de majo en la peterburga Domo de Ĵurnalistoj okazis prezento de la nova libro de sociologo Leo Semaŝko (Rusio) kaj Marta Devit (Usono). La 72-paĝa libro nomiĝas "Infana voĉdonrajto - ŝlosilo por solvi problemojn de la infanaĝo". La prezento estis dediĉita al la internacia tago de infan-protektado (1 jun). La libro baldaŭ aperos ankaŭ en Esperanto.
Redaktoro de Libera Folio en radia intervjuo
La pola radio en sia esperantlingva programo disaŭdigis intervjuon kun la redaktoro de Libera Folio, Kalle Kniivilä. En la intervjuo li rakontis pri la estiĝo de Libera Folio kaj ĝia strebado sobre kaj kritike raporti pri aktualaj okazaĵoj en la Esperanto-movado.
Feminisma iniciato kaperita de la Civito
En La Chaux-de-Fonds, la ĉefsidejo de la Esperanta Civito, estis fondita nova organizaĵo kun la nomo "Feminisma Esperanta Movado". Al ĉiuj gvidaj postenoj estis elektitaj funkciuloj de la Civito, kaj la nova organizaĵo tuj en sia fonda kunsido petis aliĝon al la Civito. Libera Folio ne rajtis legi la statuton de la organizaĵo. "Skandalgazetistoj kaj mensogantoj ricevas informojn nur post seriozaj ĵurnalistoj", respondis Anna Lászay al nia peto.
Esperantomobilo fermita
Chuck Smith rezignis pri sia projekto "Esperantomobilo", kies celo estis aĉeti aŭton kaj ĉirkaŭveturi per ĝi, disvastigante Esperanton. "La revo estis bela, la laboro estis profesia, sed tamen la mono mankis", komentas Chuck Smith.
La Jarlibro estas presata
La Jarlibro de UEA nun estas presata en Slovakio, kaj laŭ informoj el la Centra Oficejo ĝi atingos multajn membrojn antaŭ la Universala Kongreso en Pekino.
Viruso ĉe TEJO izolis la Centran Oficejon
Dum unu semajno ne estis atingebla la retejo de UEA en la adreso www.uea.org. Same ne atingeblis retpoŝtaj adresoj, kiuj finiĝas je uea.org. Post esploro evidentiĝis, ke kulpis komputila viruso kiu trafis la komputilon de TEJO
Decembro iĝis rekorda monato por Libera Folio
La populareco de Libera Folio daŭre kreskas. Dum decembro nia retejo ricevis rekordan kvanton da vizitoj, preskaŭ 6.800. Dum decembro ni atingis ankaŭ la plej altan ĝisnunan kvanton de vizitoj en unu tago, 433. Tamen la kvanto de legitaj paĝoj ne multe altiĝis, do kredeble temas grandparte pri la samaj legantoj kiuj vizitas nin pli ofte.
TEJO ne nuligas sian oficialan gazeton
En intervjuo ĵus aperinta en la oficiala gazeto de UEA, la prezidanto de TEJO Bertrand Hugon diris, ke la oficiala gazeto de TEJO ĉesos aperi kiel aparta eldonaĵo kaj iĝos kvarpaĝa informletero, dissendota kun la revuo Kontakto. Tamen laŭ Aleks Kadar, la ĝenerala sekretario de TEJO, tiu informo estas tre malaktuala kaj ne plu validas. Laŭ li, TEJO tutmonde pluvivos, sed iĝas malpli skandalema.
Štimec en la kroatia Ministrejo pri eksterlandaj aferoj
La konata esperantista aŭtoro Spomenka Štimec la 22-an de oktobro estis akceptita en la Ministrejo pri eksterlandaj aferoj de Kroatio en la fako kulturo. Ŝi prezentis kroatajn verkojn tradukitajn per Esperanto en la ĉinan, persan kaj japanan lingvojn. Akceptis ŝin konsilanto Zdenka Weber kiu gratulis al esperantistoj pro la laboro farita en la kampo kultura.
334 ĉeestis japanan kongreson
Dimanĉe en Inuyama proksime de Nagoya en Japanio finiĝis la 91-a Japana Esperanto-Kongreso. Estis 457 aliĝintoj, el kiuj 123 laŭ la japana terminologio estis "moralaj aliĝintoj", alivorte ili pagis kotizon, sed ne ĉeestis la kongreson.
Retaj problemoj ĉe Libera Folio
Ni bedaŭras, ke dum mardo kaj ĵaŭdo Libera Folio ne estis atingebla dum pluraj horoj. La unua eraro okazis pro teknika problemo en la ĉefa servilo, kie situas la datenaro de nia bulteno. La dua malŝalto estis planita.
Sukcesa Malferma tago en la Centra Oficejo
Proksimume 150 vizitantojn el 18 landoj allogis la aŭtuna Malferma tago en la Centra Oficejo de UEA sabate la 27-an de novembro. Jam dum dek jaroj oni regule aranĝas du malfermajn tagojn jare. Ĉi-foje la programo estis aparte ampleksa, kaj ankaŭ la vendoj de la libroservo estis rekordaj. La libroservo enkasigis entute 5262 eŭrojn.
HeKo plu draŝas Liberan Folion
[Novembro 2004] Kiel atendite, la oficiala komuniko de la Esperanta Civito ne malrapidis ĵeti koton sur Liberan Folion post la publikigo de nia artikolo pri la fondo de Feminisma Esperanta Movado, kiu tuj je sia naskiĝo aliĝis al la Civito. Duan sitelon da koto ricevis jam la redaktoro mem, post la publikigo de nova artikolo. En la freŝa komuniko oni ankaŭ instrukcias al FEM, kion praktike signifu "persona non grata".
Corsetti petas ĉiujn helpi la viktimojn de la cunamo
Kredeble pli ol 100.000 homoj pereis kiel viktimoj de granda submara tertremo okazinta sub la Hinda oceano. La tertremo estis la plej forta dum pluraj jardekoj, kaj la kvanto de suferintoj estas senprecedenca. La prezidanto de UEA, Renato Corsetti, alvokas ĉiujn esperantistojn helpi la viktimojn laŭ sia kapablo. Ĝis nun ne estas informoj pri esperantistaj viktimoj.
Vjetnama registaro honoras esperantiston
La prezidanto de la Japana Pacdefenda Esperanta Asocio (JPEA), Hideo Kumaki, ricevis la amikecan medalon de la vjetnama ŝtato pro duonjarcento de kontribuoj al amikeco inter la japana kaj vjetnama popoloj.
Cent mil paĝoj legitaj en Libera Folio
Jam cent mil paĝoj estis legitaj en la retejo de Libera Folio post la lanĉo de la nova retejo meze de aprilo 2004. Dum ses kaj duona monatoj, ĝis la fino de oktobro, Libera Folio ricevis entute 27.500 vizitojn, kaj ĉiu vizitanto legis mezume 3,6 paĝojn. Ĉar la plej multaj vizitantoj komencas de la ĉefa paĝo, oni povas konstati ke vizitantoj kutimas legi mezume du aŭ tri artikolojn.
Ĵurnalista asocio renaskiĝas?
Antaŭ unu jaro estis malfondita Tutmonda Esperantista Ĵurnalista Asocio. Tiam el la iamaj 130 membroj restis nur 30. Nun kelkaj eksmembroj kaj aliaj interesitoj iniciatis refondon de la asocio.
HeKo n-ro 257
Ni publikigas la plenan tekston de HeKo n-ro 257. Ni pli volonte farus ligon al la retejo de la Civito, kie oni povus atendi vidi la oficialajn komunikojn. Tamen tiu retejo jam longa tempo ne plu estas ĝisdatigata. Ni konservas la originalan literumon de la komuniko, ĉar la uzo de la fundamenta h-alfabeto laŭ la teksto havas gravan ideologian signifon por la sendinto.
Corsetti faris viziton al Unesko
La prezidanto de UEA Renato Corsetti faris laborviziton al la sidejo de Unesko en Parizo la 26-an de januaro. Dum la vizito akompanis lin estrarano Claude Nourmont kaj s-ino Renée Triolle, kiu estas la ĉefreprezentanto de UEA ĉe Unesko. Dum la renkontiĝoj kun funkciuloj de Unesko precipan atenton ricevis la kunlaboro de Unesko kaj UEA por la programo de la kulturo de paco.
La Civito kritikas malĝustan solidarecon kun suferintoj
En sia lasta oficiala komuniko en 2004 la Esperanta Civito kaptas la okazon kritiki la alvokojn de Renato Corsetti (UEA) kaj Radojica Petrović (ILEI) pro malĝuste esprimita solidareco kun la viktimoj de la katastrofego en suda Azio. Nur la reprezentanto de la Civito montris ekzemplon de ĝusta solidareco, opinias la anonima aŭtoro.
Małgorzata Handzlik sindetenis pro Dio
La 12-an de januaro la Eŭropa Parlamento voĉdonis pri la proponata nova konstitucia dokumento de la Eŭropa Unio en grava simbola voĉdonado. Por la nova konstitucio voĉdonis 500 membroj de la parlamento, kontraŭ ĝi voĉdonis 137, kaj 40 parlamentanoj sindetenis. Inter tiuj kiuj sindetenis estis ankaŭ la sola esperantista membro de la Eŭropa Parlamento, Małgorzata Handzlik. Ne partoprenis en la voĉdonado 54 el la entute 731 parlamentanoj.
La membraro de UEA kreskis je 6 procentoj
En 2003 la membraro de UEA denove komencis kresketi, post plurjara falado. En 2004 la kresko plifortiĝis. Fine de la pasinta jaro UEA havis entute 18.002 membrojn. El tiuj 5.854 estis individuaj membroj.
Esperantistoj trovis kompreneman publikon en Monda Socia Forumo
Inter la 26-a kaj la 31-a de januaro okazis la 5-a Monda Socia Forumo en Porto Alegre, Brazilo, kiun partoprenis 155 mil homoj el 135 landoj, laŭ la organizintoj. Esperanto pli kaj pli videblas en tiu giganta festo kaj diskutejo de la internacia civitana movado por tutmonda justo, sed tamen ankoraŭ je tre modesta skalo, skribas nia aŭtoro José Antonio Vergara.
UEA proponas ke UN esploru lingvajn rajtojn
UEA proponas, ke la Komisiono pri Homaj Rajtoj de UN starigu laborgrupon por pristudi la problemojn de lingvaj homaj rajtoj kaj la malobservon de homaj rajtoj pro lingvaj malegaleco kaj maljusteco. En sia raporto la laborgrupo devus proponi mez- kaj longperspektivajn agojn por certigi lingvajn homajn rajtojn en diversaj lingvaj kaj kulturaj situacioj, opinias UEA.
La litova prezidento estos alta protektanto de la UK
La Prezidento de la Litova Respubliko s-ro Valdas Adamkus akceptis la inviton esti Alta Protektanto de la 90-a Universala Kongreso de Esperanto, kiu okazos en Vilno de la 23-a ĝis la 30-a de julio 2005. La litova ŝtatestro esprimis sian varman sintenon al la UK jam en septembro 2001, kiam ĝenerala direktoro de UEA Osmo Buller vizitis Litovion por esplori la kondiĉojn por la okazigo de UK. Tiam s-ro Adamkus akceptis en la prezidenta palaco Buller kaj la prezidanton de Litova Esperanto-Asocio Povilas Jegorovas kaj parlamentanon Stasys Kruzinauskas. Dum la aŭdienco li menciis, ke li unuafoje interesiĝis kaj eĉ iom lernetis Esperanton kiel gimnaziano en Kaunas.
La delegita reto de UEA kreskis - je unu delegito
La ĵus aperinta Jarlibro de Universala Esperanto-Asocio por la jaro 2005 enhavas la nomojn de 1.784 delegitoj en 92 landoj. Jarlibro 2004 registris 1.783 delegitojn, do la delegita reto de UEA kreskis je unu delegito. Temas pri kresko de 0,06 procentoj.
EU ricevis novan, 21-an oficialan lingvon
La lingva bunteco pliiĝas en la Eŭropa Unio. Nun ankaŭ la irlanda lingvo estos oficiala laborlingvo de la unio. Entute estos do 21 oficialaj lingvoj. La decido estis anoncita lunde la 13-an de junio en Luksemburgio, kie renkontiĝis la eksterland-ministroj de EU.
Rusa Vikipedio elstarigis artikolon pri Esperanto
Ĉiusemajne la ruslingva Vikipedio elektas unu elstaran artikolon por meti ĝin en la ĉefpaĝon kaj en specialan kategorion "Elektitaj Artikoloj". Ĉi-semajne la plej enciklopedieca oni opiniis la artikolon pri Esperanto.
1463 jam aliĝis al la Vilna UK
La Dua Bulteno de la ĉi-jara Universala Kongreso de Esperanto estis dissendita. Ĝis la 4-a de marto estis registritaj 1463 aliĝintoj el 51 landoj. 171 el la aliĝintoj estas loĝantoj de Litovio.
La prezidento de Kroatio renkontis esperantistojn
La prezidento de Kroatio Stjepan Mesić akceptis la 20-an de junio delegacion de Kroata Esperanto-ligo. La prezidento interesiĝis pri la laboro de esperantistoj por enkonduki Esperanton kiel oficialan lingvon en la Eŭropa Unio.
Esperanta diservo ĉesigita post 93 jaroj
Post preskau 93 jaroj, la kristana rondo, kiu okazigas la ĉiumonatajn diservojn en Esperanto en Londono, decidis ripozigi la aranĝon ekde julio.
Kiselman protestas kontraŭ angliĝo de svedaj universitatoj
Svedaj studentoj ne plu kapablas diskuti siajn proprajn studfakojn en la sveda lingvo, ĉar ili konas la fakajn terminojn nur en la angla. Tion asertas Christer Kiselman kaj aliaj subskribintoj de artikolo aperinta en la plej prestiĝa debat-forumo de Svedio.
Libera Folio malŝaltiĝos dum kvar horoj
Pro ĝisdatigo de aparataro en la ret-servilo Libera Folio estos neatingebla dum kvar horoj, de la horo 01.00 ĝis 05.00 en ĵaŭdo la 11-a de aŭgusto, laŭ la universala horo (UTC). Poste la servo denove funkcios kiel kutime.
Esperanto Desperado koncertos en Pollando
La dana muzikgrupo Esperando Desperado ricevis subvencion de la dana Asocio por monda muziko por koncerti en Pollando. Esperanto Desperado, kiu ĵus revenis al Danio post Kultura Esperanto-Festivalo en Helsinko, ekveturos al Pollando dimanĉe la 31-an de julio.
Heming Welde Thorbjørnsen nova prezidanto de TEJO
Dum sia kunsido la 5-an de aŭgusto 2005 en Zakopane la komitato de TEJO elektis novan TEJO-Estraron por la venonta mandatperiodo (la jaroj 2005-2007). La Komitato per plejmulto de voĉoj akceptis la proponojn de la Elekta Komisiono.
Esperanto Desperado malfondita sen kvereloj
La koncertoj en Pollando estis la lastaj koncertoj de la bando Esperanto Desperado, fondita en 1996. Laŭ Kim J. Henriksen, la bando estis malfondita, ĉar la anoj ekhavis malsamajn interesiĝojn. Li akcentas, ke la bandanoj disiras amike, male ol ofte okazas en la Esperanto-movado, kie laŭ li estas preskaŭ tradicio insulti unu la alian.
Fajro detruis Esperanto-domon en Berlino
Granda fajro en la subtegmentejo de la Esperanto-domo en Berlino detruis parton de la Germana Esperanto-Arkivo kaj la kunvenejon de esperantistoj, kiuj situis en la subtegmentejo. La fajro okazis en la nokto inter la 6-a kaj 7-a de septembro. Post la fajro en la strato kuŝis duonbrulintaj folioj el esperantlingvaj libroj, rakontas ĉeestintoj. En la monatoj antaŭ la fajro pli ol 10.000 eŭroj estis uzitaj por rekonstruo de la subtegmentejo. Tuj antaŭ la IJK en la subtegmentejo loĝis 12 anoj de internacia laborbrigado.
Temo de UK 2006: daŭrigebla evoluo
La estraro de UEA decidis, ke la kongresa temo en la UK en Florenco estu "Lingvoj, kulturoj kaj edukado al daŭrigebla evoluo". La temo estas proksime ligita al la kampanjoj de Unesko, kio donos eblon atentigi Uneskon kaj la Unesko-komisionon italan kaj la florencajn Unesko-klubojn pri la kongreso.
Esperanta Civito ordigos orfojn, konkubinojn kaj gejajn parojn
La Esperanta Civito en sia baldaŭa "parlamenta sesio" intencas daŭrigi la laboron por krei sian propran leĝaron. La projektata Esperanta Civita Kodo laŭplane anstataŭos tiujn partojn de la svisa civila kodo, kiuj ne konvenas al "la specifaj karakterizoj de la Esperanta Popolo". Estas planata speciala komisiono por studi "la morojn en la esperanta socio".
La novaĵservo NUN denove funkcias
Pro teknikaj problemoj en la rethotelo, dum kelka tempo ne funkciis la novaĵ-servo NUN kaj pluraj aliaj servoj en la retejo esperanto.se. Janko Luin sukcesis refunkciigi la novaĵ-servon NUN dimanĉe la 23-an de oktobro. Baldaŭ aperos ankaŭ novaj servoj en la retejo esperanto.nu, kiun li momente plibonigas.
Fruktvendistoj lernas Esperanton en Togolando
Nova esperantlingva memortabulo pri la amikeco inter Hans Bakker kaj Gbeglo Koffi sur la muro de lernejo instigis fruktvendistinojn en Togolando lerni Esperanton, skribas Gbeglo Koffi, la direktoro de la Afrika Oficejo de UEA kaj ano de la Civito de Esperantio. Ne klaras, ĉu ankaŭ la nova virina grupo jam planas aliĝon al FEM kaj la Civito.
Ambasadoro de Belgio denove akceptis esperantistojn
La 15-an de novembro 2005, la ambasadoro de Belgio en Litovio, s-ino Marie-Louise Vanherk, denove invitis esperantistojn al solena akcepto. Dum la akcepto Povilas Jegorovas kaj aliaj esperantistoj povis en neformala etoso renkontiĝi kun diversaj litovaj gravuloj.
Berlina Esperanto-domo rekonstruota
La Berlina Esperanto-domo, kiu estis grave difektita en septembro en granda incendio, estos rekonstruita. Jam fine de decembro la oficejo de Germana Esperanto-Junularo kaj la kvin loĝejoj en la domo estos denove uzeblaj, se ĉio iros laŭ la planoj.
Ĉinio solenis la 101-an naskiĝtagon de Bakin
La 25-an de novembro 2005 oni diversloke en Ĉinio memoris solenis la 101-an naskiĝtagon de la granda verkisto Bakin, forpasinta la 17-an de oktobro. Bakin estis ankaŭ unu el la plej famaj ĉinaj esperantistoj, kaj pluraj liaj fruaj verkoj aperis en esperanta traduko.
Esperanta Vikipedio atingis novan rekordon
La 27-an de novembro aperis la 30.000-a artikolo en la esperantlingva reta enciklopedio Vikipedio. La esperantlingva versio de Vikipedio enhavas proksimume same multe da kapvortoj kiel la danlingva, sed ekzemple la svedlingva estas trioble pli granda, kaj la germanlingva dekoble pli granda.
Cento da vizitantoj en Malferma Tago de UEA
La Malferma Tago de la Centra Oficejo de UEA sabaton, la 26-an de novembro, omaĝis la 50-an datrevenon de la translokiĝo de la sidejo de UEA al Roterdamo. Ekde novembro 1955 la CO troviĝas en la nederlanda metropolo. La libroservo vendis varojn por pli ol 2.500 eŭroj, kaj kelkaj novaj eldonaĵoj estis lanĉitaj okaze de la Malferma Tago. La kvanto de vizitantoj estis ne rekorda, sed ankaŭ ne malrekorda, spite la ekstreme malbonan veteron kiu malhelpis veturadon.
Reta atako malŝaltis esperantan televidon dum tuta tago
En merkredo, la 30-a de novembro, nekonata atakanto sukcesis pere de la reto forviŝi ĉiujn informojn en la servilo de Internacia Televido, la nova esperantlingva televidkanalo kiu komencis siajn elsendojn antaŭ kelkaj semajnoj. Tiel klarigis la tuttagan malaperon de ITV la administrantoj de la projekto.
La tria urbo de Svedio reklamas sin ankaŭ en Esperanto
La oficiala hejmpaĝo de Malmö, la tria urbo de Svedio, nun havas sekcion ankaŭ en Esperanto - ankoraŭ nur provizore. Kaj la Esperanto-klubo de Malmö kaj Sveda Esperanto-Federacio festos sian 100-jaran jubileon en 2006. Lige kun tiu datreveno en Malmö maje 2006 estos aranĝita jubilea dan-sveda kongreso, kaj okaze de la kongreso la urbo konsentis aldoni ankaŭ esperantlingvan tekston al sia retejo.
La nova papo ne bondeziris en Esperanto
La nova papo Benedikto ne daŭrigis la multjaran tradicion de sia antaŭulo Johano Paŭlo la 2-a pri kristnaska saluto en Esperanto. Pasintjare Johano Paŭlo la 2-a post sia tradicia kristnaska mesaĝo diris bondeziran frazon en 62 lingvoj, inter kiuj estis ankaŭ Esperanto. En Esperanto Johano Paŭlo la 2-a diris: "Dibenitan Kristnaskon kaj prosperan novjaron".