Dobrzyński, Monato kaj Ĝangalo premiitaj en Vilno

La solena fermo de la Vilna kongreso komenciĝis en la sportejo Siemens  (salono Zamenhof) je la 10-a horo matene kaj daŭris ĝis la tagmezo. Komence  de la ceremonio ĉiuj ĉeestantoj honoris per momento de silento tiujn  honorajn membrojn de UEA, kiuj forpasis dum la pasinta jaro. Poste kantis, aktoris kaj rakontis infanoj kiuj partoprenis la infanan kongreseton. Parolis en  Esperanto la ambasadoro de Belgio, Marie-Louise Vanherk.

Kiel kutime, en la solena fermo de la kongreso oni anoncis la  ricevantojn de diversaj premioj kaj subvencioj. La "esperantistan  pacpremion", premion Deguchi, ricevis la internacia magazino Monato, kiu laŭ  la motivigo jam de kvarona jarcento permesas al esperantistoj kompreni  okazaĵojn el la vidpunktoj de lokanoj, kaj tiel kontribuas al egaleco kaj  malfermiteco al aliaj landoj. Premion Deguchi financas la religia movado  Oomoto kaj aljuĝas la estraro de UEA. La premia sumo estas 2.000  eŭroj.

La subvencion Cigno ĉi-jare ricevis agado de UEA mem, la projekto "Lingvo  de paco", kiu lastatempe precipe okupiĝas pri helpado de esperantistoj  en la kriza centra parto de Afriko. Subvencio Cigno, financata de la konata  japana mecenato Etsuo Miyoshi, valoras 500.000 japanajn enojn, alivorte ĉi-jare 3.741 eŭrojn, kaj estas jam  de deko da jaroj grava helpo al valoraj Esperanto-projektoj en la tria  mondo.

Fondaĵo Grabowski laŭ sia regularo ĉiujare prenas el sia kapitalo la sumon  de 1.150 usonaj dolaroj por aljuĝo de tri premioj konsistantaj el po 700,  300 kaj 150 dolaroj. Ĉi jare la ĉefan premion ricevis la novbakita honora membro de UEA, Roman Dobrzyński (sur la foto), kiu estis premiita pro siaj  esperantlingvaj filmoj kaj pro la verko Zamenhof-strato, kaj ankaŭ la  eldonisto Ulrich Becker, kies nova eldonejo Mondial jam aperigis  plurajn gravajn verkojn. La malpli grandajn subvenciojn ricevis la retejo  Ĝangalo "pro pionira laboro, kaj kiel kuraĝigo por aliaj ret-projektoj", kaj la revuo Laŭte.

La trofeon Fyne, per kiu ĉiun duan jaron estas premiata la plej sukcesa  landa asocio de UEA, ĉi-foje ricevis Dana Esperanto-Asocio.

En la 90-a, jubilea Universala kongreso en Vilno laŭ la fina rezulto  estis 2.344 aliĝintoj kaj ĝi iĝis la plej granda post la 84-a Universala  Kongreso en Berlino 1999. En Berlino estis 2.712 aliĝintoj. En la pasintjara kongreso en Pekino estis 2.031 aliĝintoj. La plej granda kongreso dum la pasintaj dek jaroj estis tiu en Montpellier (1998) kun 3133 aliĝintoj. Prago (1996) kun 2.972 aliĝintoj okupas la duan lokon kaj Berlino la trian.

Multaj kongresanoj el Vilno jam sabate pluveturis al diversaj postkongresaj aranĝoj.  La plej granda el tiuj oni povas konsideri la 51-an Internacian Junularan  Kongreson, kiu malfermiĝos en Zakopane en Pollando jam dimanĉe. Al la  IJK jam aliĝis pli ol 520 personoj, sed sendube pliaj aliĝos surloke.

Fotoj el la Solena Fermo: Dominique Couturier.